VOV4.Bahnar – Pơgê năr 6/12 tơ̆ Anih jang Khul kơpal teh đak, Ƀĭ thư Trung ương Đảng, Phŏ Thủ tướng Lê Minh Khái hôi xơng pơma dơnuh hăm Choi Joo Ho, Kơdră dơnơm kơ anih jang Samsung Việt Nam.

Ră hơdăh tơdrong tơbôl ‘lơ̆ng rŏ dang ei kơ 2 teh đak Việt Nam - Hàn Quốc, mă hăt noh lơ̆m tơdrong: Mŭk drăm, tĕch pơdro 2 păh, axong tơdrong jang, ODA, lơ̆m tơdrong đei jơnei atŭm noh, đei tơdrong tơgop đơ̆ng dôm anih jang mŭk drăm kơ 2 teh đak, mă hăt noh Samsung – anih axong jang kơtă đơ̆ng teh đak đe tih hloh tơ̆ Việt Nam, Phŏ Thủ tướng Lê Minh Khái bơnê kơ tơdrong đei jơnei đơ̆ng pơm jang, tĕch pơdro tơnăp đơ̆ng Samsung tơ̆ Việt Nam, mă kăl noh lơ̆m khei năr tơnap tap kơyuơ pơrang jĭ COVID-19 hơbuh hli, dôm tơdrong jang, tĕch pơdro kơ Samsung lơ̆m dôm tơdrong jang adoi hơtŏk pơtêng hăm khei năr âu xơnăm xơ̆. Kơdră dơnơm kơ anih jang Samsung Việt Nam Choi Joo Ho ăn tơbăt, truh khei năr âu, anih jang hlôi axong jang tơ̆ Việt Nam hơkŏp 17,74 tỷ USD, jên axong đei 100% kơsô̆ jên chih măt pơm jang.

Lan chih păng pơre nơ̆r