VOV4.Bahnar - Pơ gê 24/10, tơ̆ Quảng Ninh, Phó Thủ tướng Lê Văn Thành kŭm hăm khul jang kơ Khul kơ dră tĕh đak đei jơ bơ̆ jang hăm Grŭp jang kơ măy sir iŏk tơ mo ngar Việt Nam găh tơ drong jang xa. Tơ drong arih kơ đe công nhân, bơ ngai jang lơ̆m grŭp.

Grŭp jang kơ măy sir iŏk tơ mo ngar Việt Nam jang xa găh 4 tơ drong tơm ‘nŏh: pơm tơ lĕch ngar, pơm unh điên, pơm tơ mam khoáng sản, pơm tơ mam kơ măy kơ mŏk, iŏk yoa rim sơ năm hlŏh 130 rơ bâu ti hlak jên. Tơ̆ hơ năp tơ drong krê hơ mơt đơ̆ng jĭ Covid-19 mă lei Grŭp oei jang ‘lơ̆ng 2 tơ drong tơm, iŏk yoa đơ̆ng grŭp truh dang ei hlŏh 96 rơ bâu ti hlak jên; vei lăng ‘lơ̆ng tơ drong jang xa păng iŏk yoa ăn 95 rơ bâu ‘nu bơ ngai jang.  

Pơ ma lơ̆m jơ bơ̆ jang, Phó Thủ tướng Lê Văn Thành akhan, Grŭp jang athei tơ jră hăm lơ tơ drong mơ mat tat pơ long nol kăl đei hơ met pơ ‘lơ̆ng tơ̆ hơ năp kơnh nhen: Tơ drong sir iŏk tơ mo ngar, 1,2 tơ drong tơ mât jên jang oei hiơ̆ hyĭn pơ têng hăm nơ̆r hơ găt; tơ drong sơ đơ̆ng oei đei lơ tơ drong krê. Kiơ̆ đơ̆ng noh, Phó Thủ tướng athei, anih jang ngar tơ mo athei hơ tŏk tơ drong hơ met ming Grŭp jang, hơ tŏk tơ drong đei yoa ‘lơ̆ng, kơ sư̆k pơ jei đơ̆ng rim anih jang găh sư.

Dơ̆ng: Tơ blơ̆