VOV4.Bahnar - Phŏ Thủ tướng Lê Văn Thành ‘nao năm dăr hơ len, hơ len lăng tơ drong jang pơm Hnam kơ măy dơ nâu đak pơm tơ lĕch ŭnh điên Hòa Bình pơ̆ih să lơ̆m khei ‘năr đei ƀơm ưh kơ ‘lơ̆ng đơ̆ng ‘mi pơ dui đunh lơ năr âu ki. Đơ̆ng rŏng kơ tă dăr hơ len, hơ len lăng, Phŏ Thủ tướng Lê Văn Thành păng khŭl bơ̆ jang hlôi đei jơ bơ̆ jang hăm kơ dră chĕp kơ̆l rim anih tơm, anih jang, dêh char Hòa Bình, Grŭp jang ŭnh điên Việt Nam.

Phŏ Thủ tướng Lê Văn Thành mơ̆ng tơ ‘ngla tơ mơ̆t jên jang tơ roi tơ băt tơ drong

Pơ ma pơ tôch jơ bơ̆ jang, Phŏ Thủ tướng Lê Văn Thành akhan, tơ drong teh hơ lih yua đơ̆ng lơ tơ drong tơm pơm ăn nhen ‘mi tih pơ dui đunh, yua đơ̆ng đei kơ dih păng kŭm rŏ lăng yua đơ̆ng đei ƀơm ưh kơ ‘lơ̆ng lơ̆m kơ plăh bơ̆  jang tơ drong jang. Phŏ Thủ tướng athei vei sơ đơ̆ng tôch ai ăn tơ drong jang dơ nâu đak pơm tơ lĕch ŭnh điên Hoà Bình, mă loi ‘noh jĭ dơ nâu bơ̆ găn đak unh điên Hòa Bình; vei lăng cham char, hơ nih, sơ đơ̆ng ăn rim tơ drong jang lơ̆m tơ ring, mă ‘noh Rup man ƀok Hồ. Lơ̆m kơ plăh bơ̆ jang, athei vei sơ đơ̆ng tôch ai ăn kŏng nhân jang.

Thuem: Tơ blơ̆