VOV4.Bahnar - Phŏ Thủ tướng Lê Văn Thành pơ gơ̆r hop akŏm trực tuyến “Hơ met pơ ‘lơ̆ng mơ mat tat, tơ hlăk tơ hlĭn ăn rim anih jang mơ dro sa tơ̆ rim hơ nih jang kơ măy kơ mŏk, hơ nih jang mŭk drăm, hơ nih pơm tơ lĕch, hơ nih jang kơ măy kơ mŏk ‘nao păng tơ ring jang kơ măy kơ mŏk”, pơ gơ̆r ‘năr 20/9 tơ̆ Hà Nội. Kiơ̆ kơ Anih tơm tơ lĕch nơ̆r sơ kơ̆t păng tơ mơ̆t jên jang, jĭ hơ buh Covid-19 đei ƀôh krê hơ mơt, pơ dui đunh, hlôi pơm ăn hiong răm tih ăn anih jang mơ dro sa, ăn kon pơ lei. Lơ anih jang mơ dro sa athei pơ dơh pơm tơ lĕch yua đơ̆ng hơ nih pơ truh tơ mam, hơ nih pơm tơ lĕch, bơ ngai jang, lơ anih jang mơ dro sa athei hŭt dôm hla ar răt tơ mam, đei ƀôh hre kơ nê̆, ƀơm ưh kơ ‘lơ̆ng truh tơ drong arih sa kơ triệu ‘nu bơ ngai jang lơ̆m rim hơ nih jang kơ măy kơ mŏk, hơ nih jang mŭk drăm, hơ nih pơm tơ lĕch... Vă hơ met pơ ‘lơ̆ng mơ mat tat, tơ iung ming pơm tơ lĕch tĕch mơ dro rim anih jang mơ dro sa athei Khŭl kơ dră teh đak set hơ len tơ lĕch dôm trong jang pơ gơ̆r pơm tơ lĕch ‘lơ̆ng vă anih jang mơ dro sa gơh rơ̆ih iŏk lăp hăm rim tơ drong hiôk hơ dăh; asong ăn anih jang mơ dro sa kơ chăng tơ lĕch rim trong jang pơ gơ̆r pơm tơ lĕch tĕch mơ dro lăp hăm tơ drong kơ rim anih jang mơ dro sa. Hơ dai hăm ‘noh athei rim dêh char, pơ lei tơm ‘nĕ kơ tơ mơ̆t yua kư̆ kă dôm trong jang tang găn jĭ, pơm mơ mat tat ăn anih jang mơ dro sa mưh kơ dâu chơ tơ mam păng bơ ngai jang mưh năm bơ̆ jang hơ lơ̆k dơ̆ng.

Thuem: Tơ blơ̆