VOV4.Bahnar - Pơ gơ̆r ‘măng hop akŏm kăl trực tuyến tơ jră ‘mi kial hơ bŭt kơ sô̆ 6 pơ gơ̆r kơ sơ̆ ‘năr 23/9 tơ̆ Hà Nội, Phŏ thủ tướng Lê Văn Thành – Kơ dră Anih pơ gơ̆r teh đak găh tang găn ‘mi kial pơ răm - Kơ dră Anih jang teh đak tơ jră tơ drong sar bar ‘mi kial pơ răm păng tơ chă dŏng sar bar athei rim tơ ring ưh kơ gơh pơm pơ hơi lơ̆m tơ jră, athei vei sơ đơ̆ng hơ kâu jăn kon pơ lei, mă loi ‘noh jĭ lơ̆m khei ‘năr jĭ Covid 19 đei ƀôh krê hơ mơt hrei ‘nâu. Tơ roi tơ băt hrĕnh đơ̆ng Anih pơ gơ̆r teh đak găh tang găn ‘mi kial pơ răm ăn ƀôh, dang ei oei đei 21 tong duk, thŏng an kơ rim dêh char pơ lei tơm nhen: Đà Nẵng, Bình Định, Quảng Ngãi lơ̆m tơ ring krê hơ mơt, khŭl linh vei lăng tơ ring sơ lam trong đak dơ sĭ hlôi hơ dai hăm unh hnam rim tơ ‘ngla duk hơ nơ̆ng pơ ma dơ nuh krao hơ vơn rim duk năm mơ̆t lơ̆m hơ nih sơ đơ̆ng. Phŏ Thủ tướng Lê Văn Thành athei rim dêh char nhen Đà Nẵng, Quảng Nam tơ tĕnh pơ tho rim duk lĕch đơ̆ng tơ ring krê hơ mơt kơ kial hơ bŭt. Hơ dai hăm ‘noh mă pơ ‘lơ̆ng vei sơ đơ̆ng kon pơ lei tơ̆ dôm tơ ring đei hơ mơt lơ găh đak lŏk jroh, teh hơ lih kŭm nhen tơ lĕch jang trong jang pôk rĭ kon pơ lei vei sơ đơ̆ng găh bơ ngai păng mŭk drăm, hơ dai hăm ‘noh vei sơ đơ̆ng tang găn jĭ Covid 19.

Thuem: Tơ blơ̆