VOV4.Bahnar - ‘Năr brei (30/03), tơ̆ anih bơ̆ jang kơ khŭl kơ dră teh đak Phŏ Thủ tướng Kơ dră tơm jang tơ bôl Phạm Bình Minh hlôi đei jơ pơ ma dơ nuh trực tuyến hăm ƀok John Kerry, bơ ngai jang tang măt ăn Kơ dră tơm teh đak Mi găh tŏ ‘mi kial tơ plih. 2 păh drơ̆ng 1 nơ̆r hơ len lăng tơ drong pơ vei jang hơ dai tôm tơ drong Việt Nam-Mi hơ nơ̆ng hơ tŏk tơ iung pran kơ tang lơ̆m đĭ đăng rim tơ drong, hơ nhăk ăn đei yua ‘lơ̆ng ăn kơ kon pơ lei 2 teh đak. Phŏ Thủ tướng Kơ dră tơm jang tơ bôl Phạm Bình Minh hôn bơ nê kơ tơ drong Khŭl kơ dră chĕp kơ̆l kơ ƀok kơ dră tơm Joe Biden hơ tŏk loi dơ̆ng nơ̆r pơ kăp păng pơ trŭt rim tơ drong hơ drin jơ̆p plĕnh tĕh vă tơ jră hăm tŏ ‘mi kial tơ plih, lơ̆m noh đei tơ drong Mi vang mơ̆t jang dơ̆ng lơ̆m Tơ drong tơ chơ̆t Paris găh tŏ ‘mi kial tơ plih.

Phŏ Thủ tướng pơ ma hơ dăh, jĭ 1 lơ̆m dôm teh đak pŭ ƀơm kơ nê̆ kơ tang hloh đơ̆ng tŏ ‘mi kial, hăm trong jang pran kơ tang  păng đĭ hngơ̆m chĭnh trĭ ‘lơ̆ng, Việt Nam hlôi, tŏk bŏk păng gô tơ gŭm dôm nơ̆r pơ kăp apŭng plĕnh tĕh păng jang hơ dai kơ jăp hăm rim teh đak vă hơ met pơ ‘lơ̆ng rim long nol găh tŏ ‘mi kial tơ plih, lơ̆m noh đei hơ tŏk loi dơ̆ng jang hơ dai hăm Mi.

Thuem: Tơ blơ̆