VOV4.Bahnar - Kơ sơ̆ ‘năr 27/7, tơ̆ Hà Nội, Bơ ngai jang lơ̆m Anih tơm Chĭnh trĭ, Phŏ Thủ tướng Phạm Bình Minh vang hop akŏm kơ dră kơ pal trực tuyến hơ met lê̆ hơ drol ăn Hop akŏm tih găh tơ drong jang vei lăng phe ƀa, tơ mam sa 2021 (UNFSS) păng đei ƀai pơ ma tơ̆ ‘măng hop akŏm. Hop akŏm tơ lĕch tơ drong hơ găt tơ chă đei trong bơ̆ jang ‘nao vă tơ gŭm tơ plih tơ drong jang vei lăng phe ƀa, tơ mam sa, pơ trŭt rim trong jang  hơ iă hăm tơ drong jang hơ dai đơ̆ng rim bơ ngai tơ gŭm, hơ vơn đei lơ jên tơ mơ̆t jên jang teh đak păng tơ mơ̆t jên jang kơ dih vă chông trong kơ plăh tơ plih âu. Hop akŏm hơ met lê̆ hơ drol ăn Hop akŏm tih tơ drong jang vei lăng phe ƀa, tơ mam sa apŭng plĕnh teh hlôi pơ gơ̆r anih jang vei lăng phe ba păng choh jang sa Liên hợp quốc (FAO) tơ̆ anih tơm Rome, Italy kiơ̆ trong kơ tă hơ dai hăm trực tuyến. Pơ gơ̆r lơ̆m 3 năr đơ̆ng ‘năr 26-28/7, tơ drong jang ‘noh jĭ hơ yak hơ met ăn hop akŏm tih tơ pă, tơ chĕng hơ drol đei pơ gơ̆r tơ̆ anih jang Liên hợp quốc tơ̆ New York, Mi lơ̆m khei 9 truh.

Thuem: Tơ blơ̆