VOV4.Bahnar - Kơ sơ̆ (20/7), Phŏ Thủ tướng Vũ Đức Đam, Kơ dră Anih pơ gơ̆r jang kơ teh đak găh tang găn jĭ Covid-19 bơ̆ jang hăm kơ dră chĕp kơ̆l pơ lei tơm Hồ Chí Minh găh tơ drong jang tang găn jĭ păng tơ drong ƀet  vaccine. Kiơ̆ kơ Phŏ Thủ tướng, Khŭl kơ dră teh đak păng Anih pơ gơ̆r jang kơ teh đak găh tang găn jĭ Covid-19, mă loi ‘noh jĭ Thủ tướng teh đak tôch kơ bơ ngơ̆t truh tơ drong jĭ hơ buh tơ̆ pơ lei tơm Hồ Chí Minh. Pơ têng hăm Bắc Giang, pơ lei tơm Hồ Chí Minh đei tơ drong pha ra tih găh tơ drong mŭk drăm - tơ pôl, yua thoi noh Khŭl kơ dră teh đak vang tơ gŭm dôm tơ drong mơ mat tat păng gleh hrat đơ̆ng kon pơ lei pơ lei tơm.

Phŏ thủ tướng Vũ Đức Đam

Phŏ Thủ tướng pơ ma hơ dăh, tơ drong ư̆h kơ ăn yak vih vơ̆t ‘noh athei mă kơ hret, mă đơ̆ng lơ tơ ring ư̆h kơ ăn yak vih vơ̆t tôch mơ mat ră mă lei oei athei vei kơ hret. Anih tơm vei lăng găh tơ drong jang pơ gang gô ‘măn tơ gŭm hơ drol tôch ai găh tơ mam, kơ măy kơ mŏk ăn pơ lei tơm Hồ Chí Minh, mă lei, kiơ̆ apĭnh đơ̆ng pơ lei tơm hăm 18 tơ drong jang, lơ tơ mam kơ măy kơ mŏk răt tôch hơ nat, yua thoi noh athei tơ gĕch iŏk dôm tơ mam kơ măy kơ mŏk đei đơ̆ng hơ drol păng hơ drin tơ jur tơ drong F0 đei ƀôh tơ drong jĭ đơ̆ng lăp ai jing ăl.

Thuem: Tơ blơ̆