VOV4.Bahnar - Pơ gê (20/7), Phó Thủ tướng Vũ Đức Đam chĕp kơ̆l khul jang đơ̆ng Trung ương năm hơ pong, bơ̆ jang păng hơ len năng tơ drong jang tang găn jĭ Covid-19 tơ̆ Bình Dương. Anih mă blŭng khul jang hơ len năng ‘nŏh Công ty TNHH Yazaki EDS Việt Nam, tơ̆ plt Dĩ An. Công ty oei bơ̆ jang 3 tơ drong kơ tă (sŏng xa – tep – bơ̆ jang kơ tă tơ̆ hnam kơ măy) ăn vă jê̆ 400 ‘nu công nhân vă pơm ‘lơ̆ng ăn tơ drong jang xa păng tang găn jĭ Covid-19. 

Kiơ̆ đơ̆ng hơ len năng tơ drong tang găn jĭ tơ̆ âu, Phó Thủ tướng athei dôm công ty tơ̆ dêh char Bình Dương mưh tơ lĕch trong jang "3 kơ tă" athei chih tơ roi tôm tơ drong găh công nhân ăn khul kơ dră tơ ring vă bơ̆ jang ƀônh, hrĕnh hlŏh mưh hơ len năng tơ drong jĭ tơ dăh tơ̆ anih jang đei bơ ngai jĭ dăh mă jâu tơ pŏh jĭ. Tơ̆ kơ sơ̆, Phó Thủ tướng Vũ Đức Đam kŭm hăm khul jang kơ Trung ương hôp hăm khul kơ dră chĕp kơ̆l dêh char Bình Dương găh tơ drong tang găn jĭ.

Dơ̆ng: Tơ blơ̆