VOV4.Bahnar - Pơ gê ‘năr (5/8), Khŭl bơ̆ jang kơ Khŭl kơ dră teh đak yua đơ̆ng Phŏ thủ tướng Vũ Đức Đam pơm kơ dră khŭl hlôi năm hơ len lăng tơ drong jang tang găn jĭ tơ̆ dêh char Bình Phước. Khŭl bơ̆ jang hlôi năm hơ len lăng tơ drong jang hơ met bơ ngai jĭ Covid-19 tơ̆ Hnam pơ gang pơm pơ gia apŭng Đồng Phú, dêh char Bình Phước. Hnam pơ gang âu đei 150 tŏ giơng bơ ngai jĭ, bơ̆ jang đơ̆ng ‘năr 30/7 truh dang ei păng tŏk bŏk hơ met ăn 43 ‘nu bơ ngai jĭ. Hơ drol ‘noh, hnam pơ gang hơ met klăih ăn 3 ‘nu bơ ngai jĭ păng hlôi đei lĕch đơ̆ng hnam pơ gang brŏk tơ̆ hnam.

Phŏ thủ tướng Vũ Đức Đam chih iŏk păng lăng ‘lơ̆ng tơ drong hơ drin đơ̆ng khŭl ƀak si, điều dưỡng hlôi hơ met ăn bơ ngai jĭ Covid-19. Phŏ thủ tướng pơ ma hơ dăh, ‘ngoăih kơ trong hơ met đơ̆ng Anih tơm vei lăng găh jang pơ gang, tơ ring kăl kơ lăng truh tơ drong hơ dai hăm Đông, Tây y păng pơm hơ nih, đon tơ chĕng hiôk ăn bơ ngai jĭ mă ƀônh kơ klăih kơ jĭ. Dang ei, Bình Dương păng pơ lei tơm Hồ Chí Minh đei kơ sô̆ bơ ngai jĭ lơ, yua thoi noh Bình Phước ư̆h kơ gơh pơ hơi lơ̆m tơ drong jang tang găn jĭ hơ buh.

Thuem: Tơ blơ̆