VOV4.Bahnar – Pơgê năr 4/8, Phŏ Thủ tướng Vũ Đức Đam, Kơdră Jơnŭm pơgơ̆r jang kơ teh đak găh tang găn păng tơjră pơrang jĭ Covid-19, hlôi hơlen tơ̆ anih ƀet pơgang bơ̆ng jĭ tơ̆ tơring Cầu Giấy, hơlen tơdrong pơm kiơ̆ pơkăp oei ataih băl lơ̆m tơpôl tơ̆ minh ƀar anih jang păng hơlen tơdrong jang tang găn păng tơjră pơrang jĭ Covid-19 tơ̆ minh ƀar tơring pơkăp pơvei, anih pơkăp oei tơklăh akŏm lơ̆m plei tơm Hà Nội. Phŏ Thủ tướng Vũ Đức Đam xơkơ̆t plei tơm Hà Nội tơlĕch ƀet pơgang bơ̆ng jĭ va ưvei xơđơ̆ng dôm tơdrong pơkăp tang găn pơrang jĭ, anih oei xă rơngơp, vei xơđơ̆ng pơkăp oei ataih băl păng tơroi y tê̆ tom tong. Găh tơlĕch chơ chă, hơlen pham, pơkă tơring hơbuh pơrang jĭ, hơmet pơ 'lơ̆ng anih ƀơm jĭ, Phŏ Thủ tướng pơgơ̆r athei jang tenh, xek tơlang mă keh, vă pơm kiơ̆ pơkăp pơjing tơring xơđơ̆ng (tơring jơk) kơjăp, pơkă dôm anih hơbuh pơrang jĭ hli hlơt, dar deh hơ 'nhăk dôm tơring ƀônh ƀơm jĭ vih jing tơring xơđơ̆ng ưh đei hơbuh jĭ. Phŏ Thủ tướng Vũ Đức Đam ră hơdăh dôm trong jang tang găn păng tơjră jĭ athei đei jơnei kơpal hloh.

Lan chih păng pơre nơ̆r