VOV4.Bahnar  – Kơsơ̆ ‘năr brei (4/6), tơ̆ Anih jang Khul Kơpal teh đak, Phŏ Thủ tướng Vũ Đức Đam, Kơdră Jơnŭm pơgơ̆r jang kơ teh đak găh tang găn păng tơjră pơrang jĭ Covid-19 hop akŏm trư̆k tuyê̆n hăm khul kơpal dêh char Bắc Ninh păng Bắc Giang găh trong jang tang găn păng tơjră jĭ Covid-19 lơ̆m khei năr dang ei. Ră hơdăh tơdrong đei ƀôh lơ̆m anih oei tơklăh minh ƀôt, pơvei tơring tơ̆ ‘nguaih kơjăp, lơ̆m lăm pơhơi, Phŏ thủ tướng Vũ Đức Đam pơkăl, dôm dêh char kăl hơmet tơnăp tơdrong mă âu. Atŭm hăm noh, kăl pơtoi hơlen tơpôl, tơguăt hăm tơdrong iŏk hơlen pham tơ̆ dôm tơring, iŏk yua trong tơroi tơbăt y tê̆ vă băt bơngai nhôm ƀơm jĭ. Dôm năr kơ âu, kiơ̆ đơ̆ng tơdrong hơlen hăm kơmăi, hlôi ƀôh băt hloh 500 ‘nu nhôm ƀơm jĭ vă iŏk pham hơlen. Phŏ Thủ tướng Vũ Đức Đam akhan, dêh char Bắc Ninh păng Bắc Giang tơlĕch trong axong bơngai jang păng oei xa tơ̆ anih jang mŭk drăm, âu jing trong jang tơdăng, kăl hrôih đei trong jang kơjăp hloh.

Lan chih păng pơre nơ̆r