VOV4.Bahnar - Pơ gê 27/5 tơ̆ Anih jang kơ Khul kơ dră tĕh đak, Phó Thủ tướng Vũ Đức Đam, Kơ dră Anih pơ gơ̆r jang kơ tĕh đak găh tang găn jĭ Covid-19 pơ gơ̆r hôp trư̆k tuyê̆n hăm kơ dră chĕp kơ̆l plt Hồ Chí Minh găh tơ drong jĭ păng dôm trong jang tang găn jĭ covid-19.

Phó Thủ tướng Vũ Đức Đam hop akŏm trư̆k tuyê̆n hăm plt Hồ Chí Minh

Jô̆ truh 10 jơ ‘năr 27/5, plt Hồ Chí Minh đei dơ̆ng 1 kơ sô̆ bơ ngai jĭ mưh set hơ len ‘măng mă mônh, đei ƀơm truh Hnam hơ kŭm tơ drong lui Tinh lănh ‘nao, hơ tŏk đĭ đăng bơ ngai jĭ truh 25 ‘nu. Đơ̆ng rŏng đei ƀôh anih đei jĭ ‘nao, dôm khul jang kơ pal pơ gơ̆r chĕng găn, ưh ăn mât lĕch. Hrei ‘nâu, dôm khul jang kơ pal tơ chă đei 70 ‘nu bơ ngai F1 păng 336 ‘nu bơ ngai F2.

Lơ̆m jơ hôp, Phó Thủ tướng Vũ Đức Đam athei plt Hồ Chí Minh kơ chăng tơ lĕch lơ trong tang găn jĭ mă lăp, kăl đei tơ gŭm yă kiơ ‘nŏh athei tơ lĕch nơ̆r tơ roi hăm Khul kơ dră tĕh đak, dôm anih tơm, anih jang kơ pal vă jang hơ doi, vang tơ gŭm ăn. Pơ ma hơ dăh, plt HCM jĭ gơng tơ ƀưh tih găh tĕch mơ dro, Anih tơm vei lăng trong nơ năm drơ̆ng nơ̆r hăm trong jang, kơ plăh dang ei dôm ‘măng păr chơ iŏk kon pơ lei vih tơ̆ Việt Nam tam gơ̆h chơ vih tơ̆ plt Hồ Chí Minh.

Dơ̆ng: Tơ blơ̆