VOV4.Bahnar – Pơgê năr (1/12), tơ̆ Hà Nội pơgơ̆r Hop akŏm Khul tang măt jâ̆p teh đak ăn Jơnŭm pơtrŭt hŏk pơhrăm Việt Nam 'măng mă 6 păng tơbăt 25 xơnăm tơ iung pơjing Jơnŭm jang. Phŏ Thủ tướng Vũ Đức Đam truh akŏm. 25 xơnăm kơ âu, Jơnŭm pơtrŭt hŏk pơhrăm  Việt Nam hơnơ̆ng tơplih 'nao, hơvơn rim tơdrong pran vă hơtŏk Jên mong pơtrŭt hŏk pơhrăm, axong kơ trĭu suât jên hŏk ăn đe hơ ioh, bơngai pơtho, păng hŏk tro, tơgŭm hŏk tro hin dơnuh hơtŏk pơhrăm tơnăp hloh. Tơ̆ hop akŏm, Phŏ Thủ tướng Vũ Đức Đam ră hơdăh, khei năr âu ki, pơtho pơhrăm tơ̆ dôm jăl hŏk dar deh đei hơmet hơtŏk lơ̆m kơpal teh, tơdrong mă noh ăn ƀôh tôm Đảng păng kon pơlei hlôi tơrĕk truh tơdrong hŏk. Phŏ thủ tướng Vũ Đức Đam pơkăl: Jơnŭm pơtrŭt hŏk pơhrăm Việt Nam jang atŭm hăm dôm Anih jang tơm keh đang tơdrong pơkăp vă tơplih 'nao pơtho hŏk pơhrăm mă Đảng hlôi tơlĕch. Phŏ Thủ tướng Vũ Đức Đam lui ngeh hăm tơdrong iŏk jang hơtŏk tơ iung, Jơnŭm jang gô pơtoi hơtŏk pran păng tơgop kăp gĭt lơ̆m tơdrong tơ iung pơjing păng vei lăng teh đak.

Lan chih păng pơre nơ̆r