VOV4.Bahnar - Kơ sơ̆ 14/9, tơ̆ Anih jang kơ Khul kơ dră tĕh đak, Phó Thủ tướng Vũ Đức Đam pơ gơ̆r hop akŏm hăm dôm anih jang kơ pal păng bơ ngai juăt jang pơ gang găh tơ drong tơ chĕng hơ len, pơ truh kơ măy, ƀet pơ long năng, pơm tơ lĕch vaccine tang găn jĭ Covid-19.

Tơ̆ hop akŏm, bơ ngai tang măt ăn Anih tơm vei lăng jang pơ gang ăn tơ băt, tơ chĕng adrol năr ‘nâu (15/9) vă kŭm hăm Khul set hơ len roi tơ ƀôh trong pơm hla ar chih tơ băt pơ gơ̆r hôp vă pơ ma găh trong pơm hla ar asong iŏk yoa hăm vaccine Nanocovax.

Pơ ma lơ̆m hop akŏm, Phó Thủ tướng Vũ Đức Đam athei Anih tơm vei lăng jang pơ gang pơ gơ̆r hôp hăm Khul Jơ hngâm đon tĕh đak păng Khul roi tơ ƀôh trong pơm hla ar chih tơ băt vă tơ lĕch dôm nơ̆r tơ tă găh vaccine Covid-19. Phó Thủ tướng Vũ Đức Đam tơ tă ăn Anih tơm vei lăng jang pơ gang jăh pơm pơ kĕh hla ar, sek tơ lang ‘lơ̆ng ăn tơ drong vei lăng pơ gang Molnupiravir hơ met jĭ Covid-19.

Dơ̆ng: Tơ blơ̆