VOV4.Bahnar - Tơ drong kăl hloh dang ei athei pơ jei jô̆ hăm jơ năr vă tơ jră jĭ. Bơ̆n athei plang găh mŭk drăm, kon pơ lei plang tơ drong chơt hơ iă đơ̆ng kơ dih, athei mơ mat lơ̆m 1 khei ‘năr vă jơ nei jĭ buh. Tơ dăh pơm ƀônh, gô hiong răm tôch kơ tih. ‘Noh jĭ nơ̆r pơ ma hơ dăh đơ̆ng Phŏ Thủ tướng Vũ Đức Đam, Kơ dră Anih pơ gơ̆r teh đak tang găn jĭ Covid-19 tơ̆ jơ hơ len lăng tơ drong jang tang găn jĭ, hơ met bơ ngai jĭ Covid-19 tơ̆ Hnam pơ gang Quân y 175 (Anih tơm vei lăng khŭl linh) lơ̆m ‘năr 27/7. Tơ̆ jơ bơ̆ jang, Thiếu tướng Nguyễn Hồng Sơn, Kơ dră vei lăng Hnam pơ gang Quân y 175 athei ăn phep hnam pơ gang pơ jing rim trong jang hơ met Covid-19 tơ̆ rim tơ drong jang tih hloh, hơ met hiă kơ sô̆ bơ ngai jĭ tŏk. Hnam pơ gang kŭm athei pơ lei tơm Hồ Chí Minh tơ gŭm tơ mam kơ măy kơ mŏk pơ gang, hơ tŏk loi dơ̆ng tơ mơ̆t thim ăn hnam pơ gang vaccine bơ̆ng jĭ Covid-19… Phŏ Thủ tướng Vũ Đức Đam athei pơ lei tơm Hồ Chí Minh akŏm bơ ngai jang vă hơ met ăn bơ ngai jĭ Covid-19, tơ drong tơm kăl hloh ‘noh tơ jur bơ ngai lôch. Giĕng âu ki, kơ sô̆ bơ ngai jĭ jô̆ păh lăp rim năr tơ̆ pơ lei tơm Hồ Chí Minh oei hloh 4000 ‘nu, lơ hloh lơ̆m teh đak.

Thuem: Tơ blơ̆