VOV4.Bahnar - Pơ gê 26/3, tơ̆ Hnam hŏk jang pơ gang Quân y (Anĭh tơm vei lăng khul linh tĕh đak), Phó Thủ tướng Vũ Đức Đam, Kơ dră Anĭh pơ gơ̆r jang kơ tĕh đak găh tang găn jĭ Covid-19 truh hơ pong păng pơ lung khul grŭp vang tơ chĕng hơ len păng bơ ngai jang tơ gŭm vang ƀet jrŭm mă 2, jăl 2 kơ Vaccine Nano Covax.

Kiơ̆ Giáo sư, Tiến sỹ Đỗ Quyết, Kơ dră vei lăng Hnam hŏk jang pơ gang Quân Y, truh dang ei, khei ‘năr tơ chĕng hơ len, pơm tơ lĕch vaccine Nano Covax hlôi đei tơ jur tôch ai mă lei oei lăp hăm tơ drong jang khoa hŏk, sơ đơ̆ng ‘lơ̆ng vă jăh đei vaccine sơ đơ̆ng, sĭt kơ tang ăn bơ ngai Việt.

‘Măng ƀet pơ long vaccine tang găn jĭ COVID-19 Nano Covax jăl 2 đei 560 ‘nu bơ ngai chih măt ƀet pơ long năng, pơih xă bơ ngai đơ̆ng 18 truh hlŏh 60 sơ năm, lơ̆m nŏh đei 1,2 ‘nu bơ ngai đei tơ drong jĭ lơ̆m hơ kâu mă lei ưh kơ măh jĭ ăl. Jăl mă 3 vă ƀet pơ long năng tơ̆ hlŏh 10 rơ bâu ‘nu bơ ngai, đơ̆ng noh gơ̆h đei kơ sô̆ khoa hŏk vă hơ len năng, vă Việt Nam gơ̆h pơm đei vaccine hrôih, tơ chĕng adrol lơ̆m khei 9 sơ năm ‘nâu.

Dơ̆ng: Tơ blơ̆