VOV4.Bahnar - Tơ̆ hơnăp jĭ hơbŭh Covid-19 pơrăm kơtang tơ̆ pơlei tơm Hồ Chí Minh păng mĭnh ƀar dêh char găh Pơbăh, rơbau ‘nu bơngai hlôi brŏk vĭh tơ̆ pơlei hăm gre bơbĭt yak trong Glung 14. Đei bơngai vĭh tơ̆ Tây Nguyên mă lei jei đei lơ bơngai brŏk vĭh tơ̆ tơring Tŏk bŏk hơtăih hơtŏ. Yak hlŏh dôm hrĕng kilomet hăm gre bơbĭt, đei ‘măng trŭh rơbau kilômet, chơ ba tơmam drăm, đei ‘măng đei hloi hơ iŏh, prăt măng năr păng ‘mi kial, mĕ lei đe sw lăp hơpơi brŏk vĭh tơ̆ hnam sơđơ̆ng ‘lơ̆ng hơ iă. Tơ̆ jăl trong brŏk vĭh ‘nŏh, bơngai jang hlôi đei khŭl bơ̆ jang tơgŭm djru găh tơmam drăm sa, găh đak săng, vei lăng năng tông jơhngơ̆m jăn, adoi khăm hơlen vă ăn oei hơdrô̆ hăm dôm bơngai đei ƀơm trŭh tơdrong jĭ hơbŭh Covid-19.

Hơnĭh gak dăr lăng Cai Chanh (găh apŭng Dak Rlâp, dêh char Dak Nông) ‘nŏh ‘măng mơ̆t mă blŭng tơ̆ jăl trong glung 14 năm tơ̆ rim dêh char Tây Nguyên, kơna ‘nau jei jing hơnĭh chiu pŭ trăp trĭn kơ yuơ măt bơngai brŏk vĭh tơ̆ pơlei pơla roi năr roi lơ. Vă dă ƀiơ̆ tơ hlăk tơhlĭn, tơpŏh jĭ jăn, khŭl bơ̆ jang hlôi tĕnh koăng hơmet ăn trong nơnăm adoi dăr lăng tơdrong jơhngơ̆m jăn vă băt bơngai đei tơpŏh jĭ, ăn oei hơdrô̆ hloi. Ƀok Phan Nhật Thanh, Kơdră chĕp pơgơ̆r Dơnŏ anĭh vei lăng kon pơlei apŭng Dak Rlâp tơbăt: “Tơ̆ Hơnĭh gat dăr lăng hơlen Cai Chanh kơ apŭng Dak Rlâp, nhôn atŏk kơtang hlôi bơ̆ jang, pơtho tơbăt, dăr lăng păng pơm hơla bơar rim bơngai tơbăt akau jăn. Lơ̆m khei năr au ki, mă đơ̆ng lơ măt bơngai mă lei kon pơlei pơm kiơ̆ kơ jăp, oei hơtăih dĭh băl ƀlep pơkăp. Păng rim kang ƀô̆ bơ̆ jang tơ̆ Hơnĭh gak Cai Chánh jei hơnơ̆ng tơplĭh dĭh băl bơ̆ jang 1 năr 3 hơyŭh. Dôm jơ ‘năr tơhlăk ‘nŏh nhôn krao hơvơn hloi dân kuân tư̆ vê̆, kang ƀŏ jang pơgang tơring păng kang ƀô̆ bơ̆ jang tơ̆ rim tơring vang jang tơgŭm ăn”.

 Kiơ̆ chĭh jô̆ đơ̆ng hơnih bơ̆ jang dêh char Dak Nông đơ̆ng mă rim dêh char pơbăh jang kiơ̆ ăn oei hơtăih dĭh băl mĭnh năr jô̆ hơtŏ đei hlŏh 5.000 ‘nu bơngai hao gre bơbĭt vĭh tơ̆ rim dêh char Tây Nguyên. Tơ̆ Dak Nông năr tơ jê̆ au kon pơlei đơ̆ng rim dêh char brŏk tŏk lơ đei vă jê̆ 1.000 ‘nu bơngai.

Drung kơsơ̆ năr 29/7 au ki, dang 900 ‘nu bơngai jang tơ̆ Đồng Nai hlôi brŏk tơ̆ Dak Lăk hăm gre bơbĭt. Dôm bơngai au hlôi chĭh hơnăn hăm dêh char Đồng Nai păng lăp gơ̆h brŏk mư̆h test rĕnh ư̆h kơ đei ƀô̆h jĭ Covid-19 vă sơđơ̆ng ăn hoei chă dơ̆ng gô tơ̆ rim hơnĭh gak vei lăng. Rim hơnĭh bơ̆ jang dêh char Đồng Nai hlôi pơjing khŭl ba trong prăt jăl trong brŏk vă trŭh 400km, adoi ăn gre sơ ‘ngiĕo chơ tơmam drăm sa ăn khŭl. Yak brăt măng prăt năr lơ̆m jơ ‘năr ‘mi dơ̆ng, mư̆h trŭh tơ̆ Dak Lăk, khŭl bơ̆ jang dêh char Dak lăk hlôi dsơng hơvơn rim kon pơlei au păng chơ ba oei lơ̆m Hnam trương jăl pêng Tĕh đak rong ‘me Nơ Trang Lơng, pơlei tơm Buôn Ma Thuột vă pơm hla bơar.

Hơnĭh gak tang găn jĭ gơng 110 Gia Lai tơgŭm por ‘nhot ăn kon pơlei

Giĕng au ki, tơ̆ jăl trong glung 14, hơnơ̆ng đei lơ khŭl đơ̆ng pơlei tơm Hồ Chí Minh păng mĭnh ƀar dêh char Pơbăh brŏk tơ̆ pơlei. Đei bơngai năm tơ̆ Tây Nguyên, păng đei bơngai brŏk tơ̆ tơring Tŏk bŏk hơtăih hơtŏ. Lăp đơ̆ng rŏng yak hlŏh dêh char Dak Nông, đe sư yak trŭh tơ̆ Hơnĭh gak tang găn jĭ Covid-19 tơ̆ gơng 110, apŭng Chư Pưh, dêh char Gia Lai. Tơ̆ au, ƀok Hồ Văn Thanh tŏk bŏk atŭm hăm boăl hao gre bơbĭt đơ̆ng pơlei tơm Hồ Chí Minh brŏk tơ̆ Kon Tum tơbăt:“ Ĭnh brŏk đơ̆ng dêh char anai, kang ƀŏ tơ̆ au bơ̆ jang tôch phăl hơlăng, asong nhôn đak xăng, đak nhă, mi tôm, ƀĕng mi. Ba bơnê jơhngơ̆m đon ‘lơ̆ng kơ dêh char Gia Lai tôch kơ dêh”

Kiơ̆ đơ̆ng Trung tá Nguyễn Minh Tuấn, Kơdră chĕp pơgơ̆r Khŭl Kanh sat vei lăng trong nơnăm kơsô̆ 1, Kŏng ang dêh char Gia lai, lơ̆m dôm năr au ki, đei lơ bơngai păng gre brŏk đơ̆ng tơring đei jĭ hơbŭh. Lăp đơ̆ng rŏng tơroi tơbăt akau jăn ăn ƀok thây pơgang, kon pơlei đei hơmet ăn hơnĭh oei, đei por ‘nhot sŏng sa, đak nhă ăn đĕch. Đơ̆ng rŏng ‘nŏh, khŭl bơ̆ jang ba trong ăn đe sư brok tơ̆ pơlei sơđơ̆ng.“Hrei au, nhen lơ̆m dôm năr kơdrơ̆m bơngai ‘nŏh kon pơlei oei tơ̆ tơring đei jĭ hơbŭh brŏk vĭh tơ̆ pơlei ‘nŏh nhôn ba ăn oei hơdrô̆ đơ̆ng 500 trŭh 600 ‘nu bơngai. Hăm kon pơlei oei tơ̆ rim dêi char anai yak găn hlŏh dêh char Gia Lai jei dang 600 ‘nu bơngai”.

Pơtho ăn kon pơlei mơ̆t tơ̆ Hơnĭh gak tang găn jĭ Covid-19 Sao Mai

Yak brŏk vĭh tơ̆ hnam ‘moi trong glung 14, yak hlŏh dêh char Gia Lai, rim bơngai jang hơnơ̆ng tơ ƀơ̆p Hơnĭh gak tang găn jĭ Sao Mai - ‘măng mơ̆t găh pơbăh lơ̆m dêh char Kon Tum. Mă đơ̆ng ư̆h kơ gan jang trăp trĭn nhen trong mơ̆t blŭng a Cai Chanh kơ dêh char Dak Nông, mă lei jô̆ hơtŏ lơ̆m 1 năr jei đei đơ̆ng 250 trŭh 350 ‘nu yak hlŏh hơnĭh gak au. Tơ̆ au, rim khŭl bơ̆ jang chă gak vei lăng prăt măng prăt năr vă sơng hơvơn kon pơlei brŏk đơ̆ng tơring jĭ hơbŭh. Lăp đơ̆ng rŏng chă pơtho tơ ƀô̆h ăn hơnĭh pơdơ̆h, kon pơlei đei sơng iŏk đak nhă, por ‘nhot, por tơyông, ƀĕng mi păng đei tŭh đak xang ƀĕng hơdrol vă yak dơ̆ng. ‘Nhŏng Lê Hương, oei oei tơ̆ apŭng Phú Vang, tdêh char Thừa Thiên- Huế tơbăt: “Ĭnh brŏk đơ̆ng Phú Giáo, dêh char Bình Dương. Brŏk trŭh tơ̆ Bình Phước đang ‘nŏh Bình Phước ba năm tơ̆ Dak Nông. Dak Nông ba trŭh tơ̆ Gia Lai. Gia Lai tơgŭm ăn đak xăng, por ‘nhot sŏng sa, đak nhă vĭh trŭh tơ̆ au. Kanh sat vei lăng trong nơnăm dêh char Kon Tum tơ̆ au tơgŭm ăn kơ ĭnh đak xăng, por ‘nhot hăm đak nhă”.

Khŭl bơ̆ jang dêh char Kon Tum ba kon pơlei yak hlŏh dêh char

Tơ̆ hơnăp dôm tơdrong mơmat tat, hrat hrĭn kơ rim kŏng nhân, bơngai jang brŏk vĭh đơ̆ng tơring đei jĭ hơbŭh găh Pơbăh brŏk tơ̆ pơlei pơla, atŭm hăm khŭl kơdră chĕp pơgơ̆r rim dêh char tơring Tây Nguyên, lơ khŭl, hơnĭh jang, rim bơngai tơ̆ rim tơring jei hlôi vang chă tơgŭm djru mĭnh năr kơ hrĕng hơnŭng por ‘nhot sŏng sa đĕch adoi nhen tơmam drăm kăl tơgŭm ăn trong brŏk vĭh tơ̆ pơlei kơ bơngai jang đei rơvơn păng sơđơ̆ng hlŏh.

Bơngai chĭh: VOV Tây Nguyên

Tơblơ̆ nơ̆r: Amazưt