VOV4.Bahnar – Anih jang Y tê̆ plei tơm Hồ Chí Minh ăn tơbăt, pơgê 'năr brei (9/8) plei tơm Hồ Chí Minh đei Anih tơm Y tê̆ axong 600.000 kơliu vaccine AstraZeneca. Kơtă ăh đei iŏk kơsô̆ vaccine âu, plei tơm gô axong ăn dôm tơring apŭng, plei tơm Thủ Đức vă pơtoi tơlĕch ƀet pơgang bơ̆ng jĭ. Jô̆ đơ̆ng năr 22/7 truh đĭ 8/8, plei tơm Hồ Chí Minh hlôi ƀet bơ̆ng jĭ ăn jê̆ 2,3 trĭu măt kon pơlei. Lơ̆m khei 8 âu, mưh vei xơđơ̆ng kơsô̆ vaccine, plei tơm Hồ Chí Minh gơh đei tôm pơgang ƀet bơ̆ng jĭ ăn kon pơlei đơ̆ng 70-80% kơsô̆ măt bơngai đơ̆ng 18 xơnăm tŏk tơ̆ kơpal. Tơrĕk truh tơdrong jang ƀet vaccine, Anih jang Y tê̆ plei tơm Hồ Chí Minh ăn tơbăt duh 'nao đei pơkăp pơkăl rim hnam pơgang, anih jang y tê̆, anih ƀet pơgang bơ̆ng jĭ pơm trong hiôk vă kon pơlei gơh ƀet pơgang kơtă tơ̆ tơring; khăm hơlen xơkơ̆t trŏ khul pơdơh kơ ƀet; tơbang hơdăh tơdrong pơdơh tŏ xĕt năr hăm dôm bơngai tŏk bŏk oei yua pơgang, tŏk bŏk oei ƀơm tơdrong jĭ đunh xơnăm.

Lan chih păng pơre nơ̆r