VOV4.Bahnar  – Pơgê năr 8/10, Anih jang kơpal kơ plei tơm, Hô̆i đŏng kon pơlei, Anih vei lăng kon pơlei, Anih jang Măt trâ̆n tôh kuôk pơm lêh pôk hơpăh hăm khul pơm jang tơnăp lơ̆m tơdrong tang găn păng tơjră pơrang jĭ COVID-19 lơ̆m plei tơm. Ăh jơ lêh, Khul kơpal kơ plei tơm HCM pôk Ƀằng hmach bơnê ăn 55 khul jang păng Mê đak plei tơm HCM  ăn 119 'nu jang tơnăp lơ̆m tơdrong jang tang găn păng tơjră pơrang jĭ COVID-19 lơ̆m plei tơm. Lơ̆m lêh pôk hơpăh, khul kơpal plei tơm HCM duh ăn tơbăt, Hop akŏm Trung ương 4 đei lơ tơdrong kăp gĭt, lơ̆m noh đei tơdrong tang găn păng tơjră pơrang jĭ COVID-19 păng hơmet mŭk drăm lơ̆m khei năr xơđơ̆ng 'nao. Tơ̆ anăp, Anih tơm Chĭnh trĭ pơgơ̆r Khul kơpal teh đak păng rim dêh char, plei tơm athei akŏm, jang hadoi kơjăp vă dăh hrôih hơmet xơđơ̆ng ăn kơ rơbâu kon pơlei pơm jang chôt vih tơ̆ pơlei pơla. Atŭm hăm tơdrong tơgŭm bơngai jang 'meh chôt vih pơlei pơla xơđơ̆ng, vei xơđơ̆ng trong tang găn păng tơjră pơrang jĭ, athei pơgơ̆r tơnăp tơdrong hơ 'nhăk bơngai jang đơ̆ng dôm tơring chôt vih tơ̆ anih pơm jang.

Lan chih păng pơre nơ̆r