VOV4.Bahnar - "Plei tơm Hồ chí Minh athei pơm kiơ̆ kơjăp pơkăp tang găn păng tơjră pơrang jĭ, 'nguaih kơ noh plei tơm duh kăl hơtŏk tơroi tơbăt, hơvơn kon pơlei vang glơng tơdrong tơnap tap, hơvơn dih băl lơ̆m tơdrong jang tang găn păng tơjră pơrang jĭ". 'Nâu jing tơdrong pơkăl đơ̆ng Phŏ Thủ tướng Vũ Đức Đam, Kơdră Jơnŭm pơgơ̆r jang kơ teh đak găh tang găn păng tơjră pơrang jĭ COVID-19 tơ̆ 'măng hop akŏm trư̆k tuyê̆n hăm khul kơdră plei tơm Hồ chí Minh ăh kơsơ̆ năr 14/7 tơ̆ Anih jang Khul kơpal teh đak. Truh khei năr âu, plei tơm hlôi tơgŭm hloh 130 rơbâu 'nu bơngai jang, hăm pơhlom 9 rơbâu 'nu bơngai tĕch vĕ xô̆, đei 57% tơdrong pơkăp jang, đei tơring jơnei truh 90% tơdrong tơgŭm ăn bơngai đei tơdrong erih tơnap tap, bơngai tĕch pơdro  lơ̆m tơring. Phŏ Thủ tướng tơbăt hăm plei tơm pơtoi tơgŭm dôm bơngai đei tơdrong erih tơnap tap, mă hăt noh dôm tơring kon pơlei oei akŏm kơdrâ̆m bơngai hin dơnuh đơ̆ng rŏng kơ pơkăp oei tơklăh lơ̆m tơpôl, 'nguaih kơ tơgŭm găh tơmam xa, tơmam yua kăl noh kon pơlei kăl đei tơgŭm găh tơdrong erih joh ayŏ, đon bơnôh vă da ƀiơ̆ kơ pơhơ̆l lơ̆m khei năr pơm kiơ̆ pơkăp oei tơklăh.

Lan chih păng pơre nơ̆r