VOV4.Bahnar - Yua đơ̆ng ‘mi tih pơ dui đunh, tơ̆ trong Trường Sơn Đông trong năm klĕch apŭng Kon Plông, dêh char Kon Tum hlôi đei ƀôh teh hơ lih kơ tang. Kŭm hăm tơ lĕch jang tơ drong jang pơm hơ met ming, lơ̆m ‘năr 9/11, khŭl jang kơ pal hlôi ăn pơ dơh gre kơ dâu tơ̆ trong ‘nâu vă vei sơ đơ̆ng trong nơ năm.

Hơ nih teh hơ lih pơm ăn ưh kơ gơh yak vih vơ̆t

Hơ nih teh hơ lih tơ̆ trong Trường Sơn Đông, trong năm klĕch apŭng Kon Plông, dêh char Kon Tum đei ƀôh tơ̆ 176+300 hơ tăih kơ anih kơ drơ̆m xăh Ngọc Tem dang 1km. Tơ̆ hơ nih âu, hơ nă trong đei tơ sa hơ lih jrŭ 2m pơm pơ bông 2/3 kơ pal trong păng pơm hư răm 2 hlak ƀê tŏng xi măng kơ pal trong hăm kơ jung 10m hơ mơt  kơ pơm kơ tĕch trong ‘noh kơ tang. Anih vei lăng trong nơ năm III.4 hlôi athei anih jang vei lăng trong nơ năm hơ vơn bơ ngai jang, gre kơ măy kơ mŏk pơ̆ih 1 trong pơ gia păh jih.

Teh hơ lih jrŭ lơ̆m kơ pal trong

Hơ drol ‘noh, Anih vei lăng trong nơ năm III.4 kŭm hlôi apĭnh hăm rim anih jang kơ pal kơ dêh char Kon Tum tơ roi tơ băt jơ̆p jang tơ̆ rim hla ar chih kơ tơ̆ng ang, ti vi, ƀrŏ găh tơ drong ưh kơ gơh yak vih vơ̆t tơ̆ trong ‘nâu vă kon pơ lei băt păng pơ dơh kơ hao gre kơ dâu tơ̆ trong Trường Sơn Đông, trong năm klĕch dêh char Kon Tum ding truh hơ met ming đang.