VOV4.Bahnar - Kơ sơ̆ ‘năr 8/7, Anih tơm vei lăng găh trong nơ năm gre kơ dâu đei hla ar kăl gơ̆ih kơ Anih vei lăng kon pơ lei dêh char Lâm Đồng, Anih jang găh gre păr Việt Nam păng Anih jang pơ gang găh trong nơ năm gre kơ dâu găh tơ drong pơ dơh ‘mơ̆i rim ‘măng păr đơ̆ng pơ lei tơm Hồ Chí Minh truh tơ̆ Lâm Đồng păng hơ lơ̆k dơ̆ng. Tơ̆ hơ năp đei ƀôh krê hơ mơt đơ̆ng jĭ Covid-19, dôm bơ ngai đei jĭ SARS-CoV-2 tơ̆ Lâm Đồng tă kơ đei tơ poh yua đơ̆ng dôm bơ ngai truh păng brŏk đơ̆ng pơ lei tơm Hồ Chí Minh, Anih vei lăng kon pơ lei dêh char Lâm Đồng hlôi athei rim anih jang kơ pal jang kiơ̆ pơ dơh ‘mơ̆i rim gre chơ tơ moi trong teh đơ̆ng pơ lei tơm Hồ Chí Minh truh tơ̆ Lâm Đồng păng hơ lơ̆k dơ̆ng. Lơ̆m kơ plăh ‘noh, trong gre păr năm vih vơ̆t đơ̆ng 2 tơ ring âu oei bơ̆ jang hăm kơ sô̆ 5 ‘măng păr 1 giĕng, pơm ư̆h kơ ‘lơ̆ng tih truh tơ drong jang vei lăng tang găn jĭ COVID-19. Yua thoi noh, Anih tơm vei lăng găh trong nơ năm gre kơ dâu hlôi drơ̆ng nơ̆r trong jang găh tơ drong pơ dơh ‘mơ̆i dôm ‘măng păr chơ tơ moi đơ̆ng pơ lei tơm Hồ Chí Minh truh tơ̆ Lâm Đồng păng hơ lơ̆k dơ̆ng kiơ̆ athei đơ̆ng Anih vei lăng kon pơ lei dêh char Lâm Đồng. Khei ‘năr tơ mơ̆t yua jô̆ đơ̆ng ƀơ̆t tŏk bŏk măng ‘năr 9/7.

Thuem: Tơ blơ̆