VOV4.Bahnar - Hơ nơ̆ng bơ̆ jang lơ̆m hop akŏm mă 58, pơ gê hei, Anih chĕp kơ̆l pơ gơ̆r Kuô̆k hô̆i tơ gop nơ̆r hơ met ăn hop akŏm mă 1, Kuô̆k hô̆i jăl 15. Kiơ̆ tơ drong jang lơ̆m hop akŏm mă 57 kơ Anih chĕp kơ̆l pơ gơ̆r Kuô̆k hô̆i, tơ chĕng adrol năr bơ̆ jang lơ̆m hop akŏm mă 1, Kuô̆k hô̆i jăl 15 ‘nŏh 11 năr 1 puăt. Lơ̆m nŏh, đei lơ jơ năr ‘măn ăn tơ drong rơih hơ met bơ ngai jang.

Lơ̆m hop akŏm mă 1, Kuô̆k hô̆i vă pơ gơ̆r pôk rơih Kơ dră tĕh đak, Thủ tướng tĕh đak, Kơ dră Quốc hội jăl ‘nao. Dôm ‘măng hop blŭng păng ‘măng hôp pơ tôch; pơ ma nuh găh mŭk drăm, tơ pôl, jên thu mong, tơ lĕch jang kơ tĕh đak 6 khei blŭng sơ năm, trong vă jang atŏk tơ iung mŭk drăm tơ pôl 5 sơ năm, tơ drong ‘mơ ‘met, tang găn pơ huach kư̆ kă sơ năm 2020 gô đei pơih pơ re, tơ ƀôh hơ dăh lơ̆m Radio, tivi vă bơ ngai tăh hla răp mơ̆ng, lăng.

Hăm tơ drong gĭt kăl đơ̆ng hop akŏm, Kuô̆k hô̆i vă bơ̆ jang lơ năr tơ̆ Hnam Kuô̆k hô̆i. Anih jang kơ Kuô̆k hô̆i kơ chăng jang hơ doi hăm dôm anih jang kơ pal hơ met tôm tơ drong mă ‘lơ̆ng vă pơ vih ‘lơ̆ng hlŏh ăn ‘măng hop akŏm âu.

Dơ̆ng: Tơ blơ̆