VOV4.Bahnar - Pơ gê hei, 24/11, tơ̆ Hà Nội, Hop akŏm jŏh ayŏ kơ dŏ xoang lơ̆m tĕh đak tơ lĕch jang kiơ̆ tơ drong tơ chơ̆t đơ̆ng Hop akŏm mă 13 kơ Đảng đei pơ gơ̆r hăm tơ drong pơ gơ̆r đơ̆ng Tổng Bí thư Nguyễn Phú Trọng. Đơ̆ng rŏng 75 sơ năm Hop akŏm Jŏh ayŏ kơ dŏ xoang lơ̆m tĕh đak mă 1 (24-11-1946) đei pơ gơ̆r, Hop akŏm jŏh ayŏ kơ dŏ xoang lơ̆m tĕh đak sơ năm 2021 tôch gĭt kăl vă tơ iung dơ̆ng tơ drong hơ pơi ‘mĕh đơ̆ng đĭ đăng hơ drĕch hơ drung yak mât lơ̆m 1 chăl ‘nao, akŏm jơ hngâm jang atŏk tơ iung hrĕnh păng kơ jăp ăn tĕh đak.

Hop akŏm ‘măn jơ năr hơ len năng tơ drong jang kiơ̆ tơ drong Tơ chơ̆t đơ̆ng Hop akŏm mă XII kơ Đảng găh tơ drong jŏh ayŏ kơ dŏ xoang, chih pơ chĕh…; đơ̆ng nŏh drơ̆ng nơ̆r hăm trong jang, tơ drong vă jang tơm găh jŏh ayŏ kơ dŏ xoang, chih pơ chĕh đơ̆ng 2021-2026, trong jang truh sơ năm 2045. Hăm đon hơ mĕng đơ̆ng dôm tơ drong jơ nei iŏk đei đơ̆ng rŏng hop akŏm jing jơ hngâm pran vă tơ iung tơ drong hơ pơi ‘mĕh jang tŏk ăn tĕh đak jing hơ nŭk hơ noa, hiôk chơt; tơ iung đon adrin păng jơ hngâm pran đơ̆ng tơ guăt đĭ đăng hơ drĕch hơ drung, tơ mât hơ dai jơ hngâm pran hăm chăl ‘nao.

Dơ̆ng: Tơ blơ̆