VOV4.Bahnar - Gơ măng ‘năr 7/1, tơ̆ pơ lei tơm Vĩnh Long, dêh char Vĩnh Long, Trung ương Khŭl vei lăng kon pơ lei jang chŭn mir Việt Nam, Anih tơm vei lăng găh choh jang sa păng hơ tŏk tơ iung tơ ring tơ rang păng Anih vei lăngkon pơ lei dêh char Vĩnh Long jang hơ dai pơ gơ̆r lêh Festival phe ƀa Việt Nam ‘măng mă V sơ năm 2021 hăm tơ drong vang akŏm đơ̆ng kơ hrĕng kơ deng tơ mam ‘lơ̆ng hơ iă. Pơ ma tơ̆ lêh pơ gơ̆r blŭng a, ƀok Lương Quốc Đoàn, Bơ ngai jang lơ̆m Trung ương Đảng, Kơ dră Khŭl vei lăng kon pơ lei jang chŭn mir Việt Nam tơ băt, đơ̆ng rŏng hloh 35 sơ năm jang kiơ̆ trong jang tơ plih ‘nao, mă loi ‘noh jĭ đơ̆ng rŏng 13 sơ năm jang kiơ̆ tơ drong tơ chơ̆t 26 Hop akŏm ‘măng mă 7, Khŭl chĕp kơ̆l pơ gơ̆r trung ương đảng jăl X găh Choh jang sa, kon pơ lei jang chŭn mir, tơ ring tơ rang, tơ drong jang choh jang sa păng mŭk drăm tơ ring tơ rang teh đak bơ̆n hlôi iŏk đei dôm jơ nei tôch kơ chhôk ‘nă.

Festival jĭ tơ drong hiôk vă rim anih jang mơ dro sa đei tơ drong ‘lơ̆ng tơ ƀơ̆p băl tơ roi tơ ƀôh jơ̆p jang tơ mam đơ̆ng kơ dih, tơ chă bơ ngai răt tĕch, hơ tŏk tơ iung tơ drong jang kơ măy kơ mŏk pơm tơ lĕch tơ mam đơ̆ng choh jang sa tơ̆ tơ ring păng tơ ring tơ măn đak krong Cửu Long; tơ gŭm rim anih jang mơ dro sa, kon pơ lei jang chŭn mir bơ̆ jang đei yua păng tơ gŭm tơ drong jang tơ mam phe ƀa Việt Nam kŭm nhen dôm hơ năn tơ mam đơ̆ng choh jang sa đei pơ kăp ‘lơ̆ng, hơ tŏk kơ sư̆k pơ jei lơ̆m anih tĕch mơ dro apŭng plĕnh teh.

Thuem: Tơ blơ̆