VOV4.Bahnar - Pơ gê 31/12, Hop akŏm mă 11 kơ Jơ nŭm bơ ngai chih hla ar tơ roi Việt Nam (jăl 2020-2025) đei pơ gơ̆r. Hlŏh 550 ‘nu bơ ngai tang măt, dơ̆ng tang ăn hlŏh 27 rơ bâu ‘nu bơ ngai chih hla ar tơ roi găh 63 Khul chih hla ar tơ roi kơ dôm dêh char, pơ lei tơm (plt), 19 khul grŭp păng hlŏh 200 grŭp găh Khul vang truh Hop akŏm.

Adrol kơ ‘nŏh, lơ̆m jơ hôp hơ met hơ drol, Kơ dră vei lăng Khul bơ ngai chih hla ar tơ roi Việt Nam Lê Quốc Minh athei dôm bơ ngai tang măt hơ tŏk đon pơm tơm hơ dai hăm đon tơ năp, tơ păt ‘lơ̆ng mưh pơ ma nuh, pôk rơih lơ̆m hop akŏm. Dôm tơ drong đei pơ ma nuh lơ̆m hop akŏm, trong jang yoa hop akŏm tơ lĕch jing tôch gĭt kăl vang tơ gop pơm hơ tŏk tơ drong chih hla ar tơ roi kăch mang Việt Nam tŏk pran kiơ̆ chăl ‘nao, rơ gei, ‘lơ̆ng hơ iă, kơ chăng mât hơ dai hăm hla ar tơ roi tơ̆ tơ ring păng apŭng plenh tĕh, chă rơih iŏk dôm tơ drong rơ gei ‘lơ̆ng đơ̆ng apŭng plenh tĕh lăp hăm tơ drong juăt, jŏh ayŏ kơ dŏ xoang ‘lơ̆ng rŏ kơ hơ drĕch Việt Nam. 

Dơ̆ng: Tơ blơ̆