VOV4.Bahnar - Pơ gê 7/12, tơ̆ Hnam hôp Ngọc Linh, plt Kon Tum, Jơ nŭm pơ gơ̆r kon pơ lei dêh char Kon Tum jăl XII pơ gơ̆r hop akŏm mă 2. Tơ̆ hop akŏm âu, Jơ nŭm pơ gơ̆r kon pơ lei dêh char Kon Tum vă hơ len năng, pơ ma nuh păng tơ chơ̆t lơ tơ drong kăl găh hơ năp jang kơ dih.

Jơ hop akŏm mă 2, Jơ nŭm pơ gơ̆r kon pơ lei dêh char Kon Tum jăl XII

Hla ar tơ roi đơ̆ng Dơ nŏ anih vei lăng kon pơ lei dêh char Kon Tum tơ̆ hop akŏm ăn ƀôh, mă đơ̆ng athei tơ jră hăm lơ tơ drong mơ mat tat, pơ long nol păng ƀơm kơ nê̆ đơ̆ng jĭ COVID-19, mă lei sơ năm 2021 mŭk drăm, tơ pôl dêh char Kon Tum oei iŏk đei lơ tơ drong kăl, nhen: Akŏm đĭ đăng tơ mam lơ̆m tơ pôl tŏk 6,47%; Tơ drong jang mŭk drăm đei tơ plih trŏ trong; iŏk yoa jô̆ păh lăp kiơ̆ kơ̆l bơ ngai đei hlŏh 47 triu hlak jên; Thu mong jên ăn tĕh đak 3.500 ti, iŏk đei lăp hăm kơ sô̆ dêh char pơ jao; Dêh char đei dơ̆ng 8 xăh tơ ring tơ rang ‘nao; Kơ sô̆ unh hnam tơ nuh jur 4% pơ têng hăm sơ năm 2020; Tơ drong jang tang găn jĭ COVID-19 đei bơ̆ jang ‘lơ̆ng.

Lơ̆m 2,5 năr pơ gơ̆r hop akŏm mă 2, Jơ nŭm pơ gơ̆r kon pơ lei dêh char Kon Tum vă ‘măn lơ jơ ăn dôm bơ ngai tang măt tơ blang, pơm hơ dăh 1,2 tơ drong hơ găt sơ năm 2021 ưh đei jang kĕh, nhen: kơ sô̆ anih tĕch mơ dro pơ jing ‘nao lăp đei vă jê̆ 80%; hơ găt tĕh sâm Ngọc Linh pơ tăm ‘nao lăp vă jê̆ 67%... Atŭm hăm ‘nŏh pơ ma nuh, pơ drơ̆ng nơ̆r ăn tơ drong jang, trong vă jang atŏk tơ iung mŭk drăm, tơ pôl, vei sơ đơ̆ng tĕh đak sơ năm 2022.

Dơ̆ng: Tơ blơ̆