VOV4.Bahnar - Hop akŏm mă 4 kơ Anih chĕp kơ̆l pơ gơ̆r Kuô̆k hô̆i đei pơ gơ̆r pơ gê hei ‘năr (11/10). Pơ gơ̆r lơ̆m 4 năr, hop akŏm vă tơ gop nơ̆r ăn lơ tơ drong gĭt kăl, lơ̆m nŏh đei tơ drong chĕng hơ met iŏk yoa tĕh kơ tĕh đak đơ̆ng 2021-2030, trong vă jang truh sơ năm 2050 păng trong iŏk yoa tĕh 05 sơ năm (2021-2025). Găh tơ drong chih pơ jing luơ̆t, Anih chĕp kơ̆l pơ gơ̆r Kuô̆k hô̆i tơ gop nơ̆r ăn tơ drong hơ met ming, chih tơ mât dơ̆ng Phŭ lŭk – Hơ năn tơ drong hơ găt chih jô̆ kơ tĕh đak đơ̆ng Luơ̆t chih jô̆; dôm hla ar chih tơ chơ̆t găh jang pơ long năng 1,2 tơ drong jang pha ƀiơ̆ vă atŏk tơ iung dôm dêh char, plt Hải Phòng, Nghệ An, Thừa Thiên - Huế.

Găh dôm tơ drong jang mŭk drăm, tơ pôl păng jên mong kơ tĕh đak, Anih chĕp kơ̆l pơ gơ̆r Kuô̆k hô̆i tơ gop nơ̆r ăn dôm hla ar chih đơ̆ng Khul kơ dră tĕh đak găh vei lăng păng iŏk yoa jên ƀao hiêm y tê̆ sơ năm 2020; 2 sơ năm (2019-2020) bơ̆ jang kiơ̆ tơ drong tơ chơ̆t kơ sô̆ 68/2013/QH13 găh hơ tŏk tơ drong jang kiơ̆ luơ̆t găh ƀao hiêm y tê̆, năm truh ƀao hiêm y tê̆ ăn đĭ đăng kon pơ lei; tơ drong iŏk đei đơ̆ng bơ̆ jang kiơ̆ trong jang atŏk tơ iung mŭk drăm, tơ pôl păng jên thu mong, tơ lĕch jang kơ tĕh đak sơ năm 2021, trong jang atŏk tơ iung mŭk drăm, tơ pôl sơ năm 2022; jên vă thu mong, tơ lĕch jang kơ tĕh đak păng trong klăih song jên trung ương sơ năm 2022…

Dơ̆ng: Tơ blơ̆