VOV4.Bahnar - Pơ gê hei (22/11), tơ̆ Hnam Kuô̆k hô̆i, pơ gơ̆r hop akŏm mă 5 kơ Anih chĕp kơ̆l pơ gơ̆r Kuô̆k hô̆i. Hop akŏm vă pơ gơ̆r lơ̆m 2 năr, lơ̆m nŏh, Anih chĕp kơ̆l pơ gơ̆r Kuô̆k hô̆i tơ gop nơ̆r ăn lơ tơ drong gĭt kăl. Găh tơ drong chih pơ jing luơ̆t, Anih chĕp kơ̆l pơ gơ̆r Kuô̆k hô̆i tơ gop nơ̆r ăn tơ drong Tơ chơ̆t đơ̆ng Anih chĕp kơ̆l pơ gơ̆r Kuô̆k hô̆i tơl tơ blang 1,2 tơ drong lơ̆m Khôi luơ̆t sek phak.

Tơ gop ăn nơ̆r apinh đơ̆ng Khul kơ dră tĕh đak găh chih tơ lĕch dơ̆ng 02 kơ luơ̆t lơ̆m Tơ drong jang chih pơ jing luơ̆t, tơ drong tơ chơ̆t sơ năm 2022, ‘nŏh jĭ luơ̆t hơ met ming, chih tơ mât dơ̆ng 1,2 tơ drong lơ̆m Luơ̆t Tần số vô tuyến điện; Luơ̆t khăm, hơ met jĭ (vă chih hơ met); atŭm hăm ‘nŏh tơ gop nơ̆r găh tơ drong kĭ pơ kăp tơ drong tơ chơ̆t Ƀao hiêm tơ pôl đơ̆ng Khul kơ dră tĕh đak Việt Nam hăm Khul kơ dră tĕh đak Hàn Quốc.

Tơ̆ hop akŏm âu, Anih chĕp kơ̆l pơ gơ̆r Kuô̆k hô̆i oei set hơ len găh tơ drong tơ lĕch jên vei lăng, iŏk yoa jên Ƀao hiêm tơ pôl đơ̆ng 2019-2021 păng tơ chơ̆t kơ sô̆ jên vei lăng ƀao hiêm tơ pôl đơ̆ng 2022-2024. Hơ len năng hla ar chih tơ roi mưh dăr hơ len dôm hla ar chih hơ găt luơ̆t găh hơ năp jang đơ̆ng Jơ nŭm vei lăng hơ drĕch kon kông păng dôm anih jang kơ Kuô̆k hô̆i.

Dơ̆ng: Tơ blơ̆