VOV4.Bahnar - Kơ sơ̆ hei (12/07), tơ̆ Hnam Kuô̆k hô̆i, pơ gơ̆r hop akŏm mă 58 kơ Anih chĕp kơ̆l pơ gơ̆r Kuô̆k hô̆i. Pơ gơ̆r lơ̆m 3 năr, lơ tơ drong gĭt kăl gô đei pơ ma nuh lơ̆m hop akŏm âu.

Tơ̆ hop akŏm, Anih vei lăng pôk rơih tĕh đak vă roi tơ băt tơ drong hơ len năng jơ hngâm đon bơ ngai tang măt Kuô̆k hô̆i jăl 15. Đơ̆ng rŏng kơ ‘nŏh, Anih chĕp kơ̆l pơ gơ̆r Kuô̆k hô̆i tơ gop nơ̆r găh khul grŭp, kơ sô̆ bơ ngai jang lơ̆m Khul kơ dră tĕh đak jăl jang đơ̆ng 2021-2026; găh tơ drong rơih bơ ngai jang vă tơ roi ăn Kuô̆k hô̆i kŭm nhen tơ drong hơ met ăn hop akŏm mă 1, Kuô̆k hô̆i jăl 15.

Anih chĕp kơ̆l pơ gơ̆r Kuô̆k hô̆i oei vă tơ gop nơ̆r ăn trong tơ mât jên lơ̆m Tơ drong jang tơm kơ tĕh đak pơ jing tơ ring tơ rang ‘nao đơ̆ng 2021-2025 păng tơ mât jên ăn tơ drong jang tơm kơ tĕh đak Tơ jur tơ nuh hin păng vei sơ đơ̆ng tơ drong arih xa tơ pôl đơ̆ng 2021-2025; hla ar chih tơ chơ̆t găh sek tơ lang jên jang ăn Grŭp jang đak dâu Việt Nam mưh kla jên duh kơ jă lơ̆m tơ drong pơ kăp răt iŏk đĭ tơ mam jang đei đơ̆ng Tơ drong jang hlŏng hơ met đak dâu Nghi Sơn.

Dơ̆ng: Tơ blơ̆