VOV4.Bahnar - Pơ gê ‘năr 5/7, tơ̆ Anih jang Trung ương Đảng, Hop akŏm ‘măng mă 3 Anih chĕp kơ̆l pơ gơ̆r Trung ương Đảng jăl 13 hlôi pơ gơ̆r tih. Hop akŏm Trung ương ‘măng âu đei hơ năp jang: Pơ ma dơ nuh, tơ chơ̆t 1,2 tơ drong gĭt kăl nhen: Tơ lĕch trong jang hơ tŏk tơ iung mŭk drăm – tơ pôl jăl 5 sơ năm 2021 - 2025; set hơ len, tơ lĕch tơ drong tơ chơ̆t bơ̆ jang đơ̆ng Anih chĕp kơ̆l pơ gơ̆r Trung ương, Anih tơm Chĭnh trĭ, Ban Bí thư păng tơ chơ̆t bơ̆ jang đơ̆ng Anih jang hơ len lăng Trung ương jăl jang jăl 13; tơ chơ̆t jang kiơ̆ găh Tơ drong pơ kăp Đảng păng tơ chơ̆t găh tơ drong jang hơ len lăng, dăr lăng, ki luơ̆t đơ̆ng Đảng jăl jang jăl 13; hơ nơ̆ng hơ met tôm bơ ngai jang dôm kơ chư̆k chĕp kơ̆l kơ rim anih jang teh đak jăl jang Kuôk hô̆i jăl 15 vă Kuôk hô̆i pôk dăh kĭ ăn tơ̆ ‘măng hop akŏm mă mônh kơ Kuôk hô̆i jăl 15 vă jê̆ truh; păng 1,2 tơ drong gĭt kăl nai.

Tổng Bí thư Nguyễn Phú Trọng pơ ma pơ gơ̆r hop akŏm

Pơ ma pơ gơ̆r hop akŏm, Tổng Bí thư Nguyễn Phú Trọng pơ ma hơ dăh ‘nâu jĭ dôm trong tơ lĕch jang tôch kơ gĭt kăl, să tih, đei tơ drong ‘lơ̆ng tơ chơ̆t hăm tơ drong jang đang jơ nei tơ drong hơ găt, hơ năp jang hơ tŏk tơ iung mŭk drăm – tơ pôl yua đơ̆ng hop akŏm ‘măng mă 13 kơ Đảng tơ lĕch ăn.

Thuem: Tơ blơ̆