VOV4.Bahnar - Pơ gê 4/1, tơ̆ Hnam Kuô̆k hô̆i, pơ gơ̆r hop akŏm ưh ê kơ Kuô̆k hô̆i jăl 15 kiơ̆ trong trư̆k tuyê̆n truh tơ̆ 62 anih pơih pơ dăh kơ dôm dêh char, plt. Adrol kơ pơ gơ̆r, dôm bơ ngai tang măt Kuô̆k hô̆i truh hop akŏm tơ̆ Anih pơih pơ dăh lơ̆m hnam Kuô̆k hô̆i ming kơ vang pơ kao, mât hơ pong lơ̆m pơ sat Ƀok Hô.

Jơ bơ̆ jang lơ̆m Hop akŏm

Pơ ma ƀât blŭng hop akŏm, Kơ dră Kuô̆k hô̆i Vương Đình Huệ roi tơ ƀôh dôm tơ drong kăl vă dôm bơ ngai tang măt Kuô̆k hô̆i pơ ma nuh ‘nŏh jĭ: hơ len năng, drơ̆ng nơ̆r ăn tơ drong Tơ chơ̆t găh trong jang jên hu kiơ̆ sơ năm vă tơ gŭm ăn tơ drong jang tơ iung ming dơ̆ng păng jang tŏk mŭk drăm tơ pôl; hơ len năng, drơ̆ng nơ̆r ăn tơ drong Tơ chơ̆t găh Trong tơ mât jên jang man trong gre kơ dâu hrĕnh Bắc - Nam găh hơ lĕch đơ̆ng 2021-2025.

Tơ̆ hop akŏm âu, Kuô̆k hô̆i oei vă set hơ len, drơ̆ng nơ̆r Hơ len năng, chih tơ mât dơ̆ng 1,2 tơ drong lơ̆m luơ̆t tơ mât jên jang kơ tĕh đak, Luơ̆t tơ mât jên jang kiơ̆ trong tĕh đak hăm kon pơ lei jang hơ doi, Luơ̆t Tơ mât jên jang, Luơ̆t rơih anih jang, Luơ̆t unh điên, Luơ̆t tĕch mơ dro, Luơ̆t Thuê̆ tĕch tơ mam kăl păng Luơ̆t pơm kiơ̆ Nơ̆r sek tơ lang. Đơ̆ng rŏng kơ jơ pơih blŭng, Kuô̆k hô̆i mơ̆ng Khul kơ dră tĕh đak pơ re hla ar chih găh 3 tơ drong tơ chơ̆t păng 1 kơ luơ̆t oei chih pơ jing.

Dơ̆ng: Tơ blơ̆