VOV4.Bahnar - Pơ gê ‘nâu, (24/3), pơ gơ̆r ‘măng hop akŏm mă 11, Quốc hội jăl 14 . Tổng Thư ký Quốc hội Nguyễn Hạnh Phúc tơ băt, vă vei sơ đơ̆ng tôm lơ̆m tơ drong jang chă rơ̆ih bơ ngai jang kơ Đảng, teh đak, Quốc hội gô ‘măn dang 7 năr vă set hơ len, rơih tôm 1,2 kơ chư̆k jang chĕp kơ̆l dơ nơm kơ Đảng păng teh đak. Quốc hội ‘măng âu lăp rơ̆ih tôm 1,2 kơ chưk jang chĕp kơ̆l teh đak, ư̆h kơ sĭ rơ̆ih tôm đĭ đăng păng ‘nâu jĭ tơ drong jang rơ̆ih tôm ăn kơ jăl 14. Đơ̆ng rŏng ‘măng pôk rơ̆ih pơ gơ̆r, truh khei 7 sơ năm ‘nâu, Quốc hội gô hơ nơ̆ng rơ̆ih tôm bơ ngai jang ăn kơ jăl 15 păng tơ drong pơ ma iok kơ chư̆k jang pơ gơ̆r hmă kiơ̆ tơ drong hơ găt. Tơ chĕng hơ drol tơ̆ ‘măng hop akŏm âu, Quốc hội gô pơ gơ̆r pơ dơh kơ jang 1,2 kơ dră chĕp kơ̆l dơ nơm kơ Đảng, teh đak hơ dai hăm pôk bơ ngai jang tơ plih pơm dôm kơ chư̆k âu hăm trong tăh kơ phiê̆u hrĕp. Kŭm hăm ‘noh, Quốc hội kŭm gô pơ gơ̆r pôk, pơ dơh kơ jang pơm dôm kơ dră chĕp kơ̆l rim anih jang teh đak, ‘noh đei: Phŏ kơ dră teh đak, 1,2 Phŏ kơ dră Quốc hội păng Kơ dră vei lăng Anih jang kơ Quốc hội, Kơ dră jô̆ hơ len jên teh đak, Tổng Thư ký Quốc hội, 1,2 Phŏ Thủ tướng, Kơ dră tơm păng bơ ngai jang nai kơ khŭl kơ dră teh đak. Hơ dai hăm ‘noh, Quốc hội gô ăn pơ dơh jang, pôk ‘nao Kơ dră Jơ nŭm vei lăng Pôk rơ̆ih teh đak.

Thuem: Tơ blơ̆