VOV4.Bahnar - Pơ gê hei (17/8), tơ̆ Hnam Kuôk hô̆i, pơ gơ̆r ‘măng hop akŏm mă 2 kơ Anih chĕp kơ̆l pơ gơ̆r kuôk hô̆i. Pơ gơ̆r lơ̆m 2 năr, ‘măng hop akŏm âu, Anih chĕp kơ̆l pơ gơ̆r Kuôk hô̆i gô ăn tơ gop nơ̆r lơ̆m 4 tơ drong tơm tih, lơ̆m noh đei ăn tơ gop nơ̆r yak blŭng găh tơ drong hơ met ăn ‘măng hop akŏm mă 2, Kuôk hô̆i jăl 15. Tơ̆ ‘măng hop akŏm âu, Anih chĕp kơ̆l pơ gơ̆r Kuôk hô̆i ăn tơ gop nơ̆r găh tơ roi tơ băt đơ̆ng khŭl kơ dră teh đak găh tơ drong jang kiơ̆ rim trong jang tơ gŭm găh ƀao hiêm tơ pôl, vei lăng păng iŏk yua jên mong ƀao hiêm tơ pôl sơ năm 2020; set hơ len, tơ chơ̆t găh tơ drong kăl, tơ drong hơ găt păng tơ chơ̆t kơ sô̆ klăih song jên tơ lĕch hơ nơ̆ng jên jang teh đak sơ năm 2022. Tơ̆ ‘măng hop akŏm, Anih chĕp kơ̆l pơ gơ̆r Kuôk hô̆i gô pơ tôch ‘măng hop akŏm mă mônh, Kuôk hô̆i jăl 15 păng ăn tơ gop nơ̆r yak blŭng găh tơ drong hơ met ăn ‘măng hop akŏm mă 2, Kuôk hô̆i jăl 15; ăn tơ gop nơ̆r hla ar chih tơ chơ̆t tơ lĕch ăn tơ drong tơ chơ̆t bơ̆ jang ‘lơ̆ng đơ̆ng Jơ nŭm vei lăng hơ drĕch kon kông, rim anih jang kơ Kuôk hô̆i; set hơ len, tơ chơ̆t tơ drong pơ jing, tơ klăh anih jang dăr hơ len tơ drong yoch quân khu păng dang ăi, anih jang dăr hơ len tơ drong yoch tơ ring lơ̆m khŭl linh kon pơ lei...

Thuem: Tơ blơ̆