VOV4.Bahnar - Pơ gê ‘năr 17-6, Anih vei lăng kon pơ lei dêh char Gia Lai jăl 11 pơ gơ̆r ‘măng hop akŏm mă 21 (tơ drong jang). Tơ̆ ‘măng hop akŏm ‘măng âu, Jơ nŭm pơ gơ̆r kon pơ lei dêh char Gia Lai set hơ len, tơ chơ̆t trong jang tơ mơ̆t jên jang 83 tơ drong jang yua đơ̆ng Anih vei lăng kon pơ lei dêh char pơ truh. ‘Nâu jĭ rim tơ drong jang tôch kơ gĭt kăl, 1,2 tơ drong jang gô jing tơ drong ‘lơ̆ng, tơ drong jang tơm, gĭt kăl vă hơ tŏk tơ iung anih jang kăl ki thuơ̆t, anih jang kăl tơ pôl kơ dêh char, lơ tơ drong jang đei ƀơm tih truh tơ drong hơ tŏk tơ iung mŭk drăm tơ pôl kơ dêh char lơ̆m jăl jang 2021-2025 păng dôm sơ năm đơ̆ng rŏng dơ̆ng. Pơ ma pơ gơ̆r hop akŏm, kơ dră Jơ nŭm vei lăng kon pơ lei dêh char Gia Lai athei rim bơ ngai tang măt Jơ nŭm pơ gơ̆r kon pơ lei dêh char, rim bơ ngai tang măt vang akŏm set hơ len kiơ̆ lơ̆m jơ hngơ̆m đon tơ păt, tơ năp, ‘lơ̆ng păng pơ ma dơ nuh, akŏm lơ̆m dôm tơ drong tơm hăm rim tơ drong jang, vă Jơ nŭm pơ gơ̆r kon pơ lei dêh char băt hơ dăh dôm trong jang, tơ chơ̆t ƀlep, hơ tŏk iŏk yua jên đơ̆ng tơ lĕch trong jang tơ mơ̆t jên jang teh đak păh lăp khei ‘năr đơ̆ng jăl jang 2021-2025 yua kơ tơ drong hơ tŏk tơ iung kơ dêh char”.

Thuem: Tơ blơ̆