VOV4.Bahnar - Pơ gê ‘năr 21/12, tơ̆ Hà Nội, Anih ‘măn răk tơ mam drăm so Drŏ kăn Việt Nam pơ gơ̆r pơ dă pơ đơ̆k joh hơ ri gĭt kăl păng bơ ngai gĭt kăl đei hơ năn “ Rok kiơ̆ jơ̆ng Đại tướng”, ƀlŏk hơ dơ̆r kơ Đại tướng Võ Nguyên Giáp. Bơ ngai pơ cheh 110 ƀai pơ đơ̆k âu ‘noh bơ ngai pơ tho hŏk, bơ ngai chih hla ar kơ tơ̆ng ang, bơ ngai chih pơ đơ̆k Nguyễn Thị Mỹ Dung, bơ ngai hlôi đei jơ tơ ƀơ̆p păng chih găh Đại tướng hloh 20 sơ năm âu ki.

Pơ dă tơ drong pơ đơ̆k joh hơ ri “ Rok kiơ̆ jơ̆ng Đại tướng”

Hăm jơ hngơ̆m hưch hanh păng ƀlŏk hơ dơ̆r gĭt kăl, bơ ngai pơ tho hŏk, bơ ngai chih pơ đơ̆k Nguyễn Thị Mỹ Dung hlôi năm tơ chă tơ̆ rim hơ nih Đại tướng Võ Nguyên Giáp hlôi năm klĕch nhen kăn kư̆ teh Cao – Bắc – Lạng,  hơ nih tơ blăh Điện Biên… vă hlôh hloh găh tơ drong gĭt kăl. Hloh 20 sơ năm hơ drin đĭ jơ hngơ̆m păng đon hơ gei, bơ ngai pơ tho hŏk, bơ ngai chih pơ đơ̆k Nguyễn Thị Mỹ Dung hlôi pơ cheh kơ hrĕng ƀai pơ đơ̆k joh hơ ri “ Rok kiơ̆ jơ̆ng Đại tướng” hăm jơ hngơ̆m đon ling lang tơ chĕng, ‘meh vă pơ gơ̆r 1 ‘măng pơ dă ƀlep ƀơ̆t tơ băt 110 sơ năm năr rơ neh kơ Đại tướng Võ Nguyên Giáp.

Thuem: Tơ blơ̆