VOV4.Bahnar - Kơ sơ̆ ‘năr 29/3, tơ̆ hnam Quốc hội, Anih chĕp kơ̆l pơ gơ̆r Quốc hội pơ gơ̆r lêh pơ jao hơ păh Mê đai bơ̆ jang Quốc hội ăn kơ dôm bơ ngai tang măt Quốc hội jăl 14. Kơ dră Quốc hội Nguyễn Thị Kim Ngân pơ gơ̆r jơ pơm lêh. Pơ ma tơ̆ jơ pơm lêh, Kơ dră Quốc hội Nguyễn Thị Kim Ngân tơ băt, ‘nâu jĭ khei ‘năr ‘lơ̆ng hơ iă vă pôk pơ ư, chih iŏk dôm tơ drong vang tơ gop ‘lơ̆ng đei yua đơ̆ng dôm bơ ngai tang măt Quốc hội hăm rim tơ drong jang kơ Quốc hội lơ̆m jăl jang âu ki kŭm nhen rim jăl jang vă jê̆ truh, tơ gop pơ tăl dơ̆ng trong yak 75 sơ năm pơ jing păng hơ tŏk tơ iung đơ̆ng Quốc hội Việt Nam.

Tơ̆ jơ pơm lêh, ƀok Trần Văn Túy, Kơ dră Khŭl bơ̆ jang tang măt ( Anih chĕp kơ̆l pơ gơ̆r Quốc hội) hlôi tơ roi tơ drong tơ chơ̆t đơ̆ng Anih chĕp kơ̆l pơ gơ̆r Quốc hội găh tơ drong hơ păh Mê đai bơ̆ jang Quốc hội Việt Nam hăm 472 ‘nu bơ ngai tang măt Quốc hội jăl 14.

Thuem: Tơ blơ̆