VOV4.Bahnar - Pơ gê 15/4, tơ̆ dêh char Ninh Thuận, Anih tơm vei lăng choh jang xa păng atŏk tơ iung tơ ring tơ rang pơ gơ̆r hop akŏm pơ tôch tơ drong rei pơ tăm ƀa phang 2020-2021; tơ lĕch trong rei pơ tăm ƀa pơ yan 2021 kơ dôm dêh char tơ ter đak dơ sĭ găh Pơ băh tơ ring Tŏk bŏk păng Tây Nguyên.

Kiơ̆ trong vă jang ƀa pơ yan sơ năm ‘nâu, lơ̆m tơ ring đei hlŏh 180 rơ bâu ha tŏk 20 rơ bâu ha pơ têng hăm sơ năm 2020; plei ƀa iŏk đei hlŏh 61 tă/ha, tŏk 0,49 tă/ha; akŏm đĭ đăng ƀa đei truh 1.116 rơ bâu tân, tŏk 132 rơ bâu tân pơ têng hăm ƀa pơ yan sơ năm 2020.

Ƀok Lê Quốc Doanh-Phŏ Kơ dră tơm vei lăng choh jang xa păng atŏk tơ iung tơ ring tơ rang pơ ma hơ dăh: Dôm tơ ring yơ ưh kơ măh đak vă rei pơ tăm ƀa ‘nŏh athei dôm tơ ring tơ plih chă pơ tăm dơ̆ng ƀum hơ ƀo. ‘Nâu jĭ dôm trong jang tôch đei yoa lơ̆m khei ‘năr âu ki. Găh hơ drĕch ƀa athei iŏk rei pơ tăm hăm hơ drĕch ƀa ‘lơ̆ng, ƀa ƀou phu; dôm hơ drĕch ƀa kơ đĕh khei ‘năr vă gơ̆h đei măh mai đak.

Dơ̆ng: Tơ blơ̆