VOV4.Bahnar - Tơ̆ hơ năp đei ƀôh krê hơ mơt đơ̆ng jĭ Covid - 19 yua đơ̆ng tơ til chă ƀôh lơ anih bơ ngai jĭ lơ̆m tơ pôl, kơ sơ̆ ‘năr 24/10, Anih vei kon pơ lei pơ lei tơm Buôn Ma Thuột (Dak Lak) hlôi tơ lĕch hla ar athei rim anih tĕch mơ dro pơ vih pơ văn et sa ( hnam tĕch mơ dro et sa, huch cheh phe...) pơ dơh kơ pơ vih kơ tă tơ̆ anih, lăp gơh asong ăn tĕch hơ nhăk vih đĕch. Khei ‘năr tơ mơ̆t yua đơ̆ng 6 jơ drơ̆m kơ sơ̆ ‘năr 25/10 truh đĭ ‘năr 10/11/2021. Hơ drol ‘noh, ‘năr (21/10), Anih vei lăng kon pơ lei pơ lei tơm Buôn Ma Thuột hlôi đei hla ar kăl vă hơ tŏk hloh dơ̆ng tơ drong jang tang găn jĭ Covid -19.

Mĭnh anih kon pơ lei oei tơ̆ pơ lei tơm Buôn Ma Thuột đei pơ vang găn yua kơ đei bơ ngai jĭ Covid -19 lơ̆m tơ pôl

Thoi noh, lơ̆m dang 3 năr âu ki, Anih vei lăng kon pơ lei pơ lei tơm Buôn Ma Thuột hlôi hơ nơ̆ng tơ lĕch hla ar hơ met ming dôm tơ drong hơ găt găh tĕch mơ dro tơ mam yua kăl vă hơ tŏk loi dơ̆ng tơ drong jang tang găn jĭ  Covid – 19 lơ̆m pơ lei tơm. Tơ̆ Dak Lak, lơ̆m 24 jơ âu hei, jô̆ đơ̆ng 4 jơ kơ sơ̆ ‘năr  (23/10) truh 4 jơ kơ sơ̆ ‘năr (24/10), lơ̆m dêh char đei 93 ‘nu jĭ SARS-Cov-2, thị xã Buôn Hồ đei kơ sô̆ bơ ngai jĭ lơ hloh hăm 50, apŭng Cư M’gar 19, pơ lei tơm Buôn Ma Thuột 13, apŭng Cư Kuin 11.

Thuem: Tơ blơ̆