VOV4.Bahnar - ‘Năr 27/8, dêh char Dak Lak hlôi pơ tơm jang kiơ̆ tơ lĕch jang hơ len lăng hrĕnh pơ rang jĭ SARS –CoV -2 ăn đĭ đăng kon pơ lei pơ lei tơm Buôn Ma Thuột vă rơ̆ih iŏk kơ chăng, chă ƀôh tơ tom F0 lơ̆m tơ pôl. Lơ̆m năr blŭng a, pơ lei tơm Buôn Ma Thuột hlôi hơ len lăng ăn kơ dang 10 rơ bâu ŭnh hnam kon pơ lei tơ̆ 2 phường Thống Nhất păng Tự An hăm 62 hơ nih iŏk đak muh, đak hai. Ƀok Đoàn Ngọc Thượng, Phŏ kơ dră Anih vei lăng kon pơ lei pơ lei tơm Buôn Ma Thuột tơ băt, vă tơ drong jang iŏk test hrĕnh COVID -19 vei sơ đơ̆ng kiơ̆ ƀlep tơ drong hơ găt, pơ lei tơm hlôi pơ jing 70 grŭp iŏk đak muh, đak hai hơ len lăng păng 2 grŭp iŏk đak muh, đak hai chă nơ năm pơ gơ̆r iŏk đak muh đak hai hơ len lăng hrĕnh pơ rang jĭ SARS-CoV-2 ăn kon pơ lei tơ̆ 21 xăh phường.

Kon pơ lei phường Thống Nhất pơm test hrĕnh lơ̆m ‘năr 27/8

Mĭnh grŭp pơm kiơ̆ hơ len lăng dang 400 ‘nu 1 năr. Jơ năr iŏk đak muh đak hai hơ len lăng tơ chĕng hơ drol gô đang lơ̆m dang đơ̆ng 5-7 năr hăm kơ sô̆ hơ len lăng dang 375.000 ‘nu. ‘Năr 27/8, tơ̆ rim grŭp iŏk đak muh đak hai lơ̆m 2 phường Thống Nhất păng Tự An tam mă đei chă ƀôh bơ ngai hơ yơ đei jĭ SARS-CoV-2.

-Đơ̆ng 6 jơ kơsơ̆ năr 26/8, Pơlei tơm Buôn Ma Thuột, dêh char Dak Lak hlôi jang kiơ̆ ăn oei hơdrô̆ kiơ̆ Nơ̆r athei jang kiơ̆ 16. Kiơ̆ kơ ‘nŏh, lơ̆m 5 năr blŭng, pơlei tơm athei kon pơlei ư̆h kơ gơ̆h lĕch tơ̆ ‘ngoăih vă pơgơ̆r test rĕnh tơchă F0 lơ̆m kon pơlei. Lơ̆m khei năr au, Dơnŏ anĭh vei lăng kon pơlei kơ pơlei tơm Buôn Ma Thuột pơjao ăn rim tơring, phương pơjing “siêu thĭ 0 đồng” vă tơgŭm ăn rim ŭnh hnam tơnap, adoi jang kiơ̆ trong jang  “Năm tơ̆ kơchơ tơgŭm ăn kon pơlei”. ‘Măng mă blŭng, rim siêu thĭ, hơnĭh tơm mơdro sa lơ̆m pơlei tơm Buôn Ma Thuột jang kiơ̆ tĕch mơdro kiơ̆ “combo phe ƀa tơmam drăm sa kăl” hăm kơ jă đơ̆ng 100.000 trŭh 500.000 hlak jên vă sơđơ̆ng ăn tơdrong răt sa kơ kon pơlei. Dang ei, đei 5 hơniư̆h tĕch mơdro lơ̆m pơlei tơm ‘nŏh siêu thị Go Buôn Ma Thuột, siêu thị Co.opmart Buôn Ma Thuột, siêu thị MM Mega Buôn Ma Thuột, hơnĭh tĕch mơdro Vinmart, hơnĭh tĕch mơdro Bách hóa xanh gô tĕch mơdro tơmam drăm kiơ̆ online, tĕch kiơ̆ combo păng jang kiơ̆ sơđơ̆ng kơ jă hăm lơ tơmam drăm kăl.

Tơblơ̆ nơ̆r: Thuem-Amazưt