VOV4.Bahnar - Tơ roi tơ băt đơ̆ng Phŏ Thủ tướng chĕp kơ̆l pơ gơ̆r Trương Hòa Bình lơ̆m ‘măng hop akŏm pơ gê ‘năr 1/6, Kơ dră Anih vei lăng kon pơ lei pơ lei tơm Hồ Chí Minh Nguyễn Thành Phong tơ băt, tơ̆ hơ năp hơ mơt kơ jĭ hơ buh tơ poh lanh să lơ̆m rim hơ nih jang kơ măy kơ mŏk, hơ nih jang sa, vă jê̆ truh âu kơnh pơ lei tơm gô tơ lĕch jang tơ̆ 1,2 anih jang mơ dro sa bơ̆ jang kiơ̆ gơ gar tơ ring ăn oei hơ drô̆ hai jang sa hai vă tang găn tơ poh lanh jĭ hơ buh mư̆h đei. Pơ lei tơm kŭm yak mơ̆t lơ̆m tơ lĕch jang tơ gŭm mă 2 ăn rim anih jang mơ dro sa đei ƀơm kơ nê̆ yua đơ̆ng jĭ Covid-19. Dang ei, pơ lei tơm Hồ Chí Minh hlôi đei 3 ‘nu bơ ngai jĭ bơ̆ jang lơ̆m 3 hơ nih jang kơ măy kơ mŏk ‘noh: Hơ nih jang kơ măy kơ mŏk Tân Bình, Hơ nih jang kơ măy kơ mŏk Tây Bắc Củ Chi, Hơ nih jang kơ măy kơ mŏk Vĩnh Lộc- Hóc Môn. Kiơ̆ kơ ƀok Nguyễn Thành Phong, Kơ dră Anih vei lăng kon pơ lei pơ lei tơm Hồ Chí Minh, tơ̆ hơ năp tơ drong hơ mơt tơ poh jĭ hơ buh, 1 lơ̆m dôm tơ drong tơm kăl akŏm dang ei ‘noh jĭ iŏk đak muh, pham ăn kŏng nhân bơ̆ jang lơ̆m hơ nih jang kơ măy kơ mŏk, hơ nih pơm tơ lĕch, hơ nih jang kơ măy kơ mŏk ‘nao. Dang ei pơ lei tơm đei 1.600.000 kŏng nhân. Hơ drô̆ hơ nih jang kơ măy kơ mŏk, hơ nih pơm tơ lĕch đei 280.000 kŏng nhân păng 3000 bơ ngai joăt jang, hơ nih jang kơ măy kơ mŏk ‘nao ‘noh 45.000 ‘nu.

Thuem: Tơ blơ̆