VOV4.Bahnar - Tơ̆ ‘măng hop akŏm trực tuyến kơ sơ̆ ‘năr 17/6 hăm pơ lei tơm Hồ Chí Minh păng dêh char Bắc Giang, Phŏ Thủ tướng Vũ Đức Đam, Kơ dră Anih pơ gơ̆r jang teh đak tang găn jĭ Covid-19, tơ tă kơ pơ lei tơm Hồ Chí Minh hơ nơ̆ng hơ tŏk loi dơ̆ng tơ drong hơ len lăng pham, băt hơ dăh hrôih rim hơ nih jĭ vă gơ var chĕng găn ƀônh, hơ drin ư̆h kơ lê̆ kơ̆m yak vih vơ̆t lơ̆m pơ lei tơm lơ̆m khei ‘năr đunh dêh hnang păng veh ver đei ƀôh tơ drong vei lăng ư̆h kơ hret lơ̆m tơ ring pơ vang găn, kơ̆m yak vih vơ̆t lơ̆m tơ pôl. Roi sơ đơ̆ng hăm tơ drong jang hơ len lăng pham đơ̆ng pơ lei tơm Hồ Chí Minh ƀơ̆t hlôi đei hơ tŏk 30.000 test hla ar lơ̆m 1 năr hrei ‘nâu, Phŏ Thủ tướng Vũ Đức Đam tơ tă kơ pơ lei tơm Hồ Chí Minh kăl kơ jang kiơ̆ tơ păt rim tơ drong hơ găt tang găn jĭ, hơ drin tang găn, ư̆h kơ lê̆ jĭ tơ poh lanh să lơ̆m hơ nih jang kơ măy kơ mŏk. Oei tơ̆ dêh char Bắc Giang hlôi ăn phep 123 anih jang mơ dro sa bơ̆ jang hơ lơ̆k dơ̆ng hăm vă jê̆ 20 rơ bâu ‘nu kŏng nhân bơ̆ jang. Kiơ̆ kơ Phŏ Thủ tướng Vũ Đức Đam, dêh char Bắc Giang kăl kơ klăih song hơ nih ăn oei hơ drô̆ akŏm oei đei bơ ngai jĭ păng hơ nih lơ năr ư̆h pă đei F0, đơ̆ng noh akŏm rim trong jang vă hơ met pơ ‘lơ̆ng pơ tôch tơ̆ dôm hơ nih ăn oei hơ drô̆ tam mă sơ đơ̆ng.

Thuem: Tơ blơ̆