VOV4.Bahnar - Tơ̆ tơ drong jang “Kon pơ lei apĭnh _ Pơ lei tơm tơl nơ̆r” pơ gơ̆r gơ măng ‘năr (13/9), Phŏ Kơ dră Anih vei lăng kon pơ lei pơ lei tơm Hồ Chí Minh Lê Hòa Bình tơ roi lơ tơ drong kơ tơ̆ng ang tơl tơ blang găh dôm tơ drong hơ găt vei sơ đơ̆ng vă pơm rơ hơi tơ drong ưh kơ ăn yak vih vơ̆t lơ̆m tơ pôl păng trong jang tơ gŭm anih jang mơ dro sa tơ iung jang pơm tơ lĕch, tĕch mơ dro. Kiơ̆ kơ ‘noh, hăm dôm tơ drong hơ găt vei sơ đơ̆ng vă pơ̆ih ‘măng hơ lơ̆k dơ̆ng mŭk drăm, ƀok Lê Hòa Bình tơ băt: Pơ lei tơm pơ jing 8 tơ drong hơ găt ăn rim anih jang.

Đơ̆ng rŏng ‘năr 15/9, pơ lei tơm Hồ Chí Minh pơ long lăng pơ̆ih ‘măng 1,2 tơ ring

Tơ drong hơ găt âu gô jang đang hơ drol kơ ‘năr 16/9, đơ̆ng rŏng ‘noh tơ lĕch jang pơ long tơ̆ Quận 7, apŭng Củ Chi păng apŭng Cần Giờ; hơ len lăng pơ̆ih să dơ̆ng tơ̆ Hơ nih pơm tơ lĕch Tân Thuận păng Hơ nih jang kơ măy kơ mŏk ‘nao - pơ lei tơm Thủ Đức. Lơ̆m kơ plăh pơ long lăng, tơ dăh tơ ring, hơ nih jang hơ yơ iŏk đei tơ drong hơ găt ‘noh kŭm gơh ăn bơ̆ jang. Găh trong jang tơ gŭm anih jang mơ dro sa, đơ̆ng rŏng ‘năr 15/9, pơ lei tơm Hồ Chí Minh gô bơ̆ jang hăm Grŭp bơ̆ jang gĭt kăl kơ Khŭl kơ dră teh đak vă đei nơ̆r apĭnh lăp.

Thuem: Tơ blơ̆