VOV4.Bahnar - Anih jang Đảng pơ lei tơm Hồ Chí Minh ‘nao pơ gơ̆r Hop akŏm tơ ƀơ̆p muh măt tơ băt 46 sơ năm Năr rơ ngei tơ ring pơ băh, teh đak rơ ngei keh kong (30-4-1975 - 30-4-2021). Tơ̆ jơ hop akŏm tơ ƀơ̆p muh măt, kơ dră chĕp pơ lei tơm Hồ Chí Minh hlôi pơ gơ̆r tơ drong joăt pôk hơ păh hơ năn chơt hơ iă teh đak “ Mĕ Việt Nam nŭih mơng” ‘măng mă 41 hăm 14 ‘nu mĕ hlôi đei klo, kon lôch hơ chăng yua kơ tơ drong jang pơm rơ ngei hơ drĕch hơ drŭng, pơ jing păng vei lăng teh đak. Pơ ma tơ̆ jơ pơm lêh, Bí thư anih jang Đảng pơ lei tơm Hồ Chí Minh Nguyễn Văn Nên pơ ma hơ dăh, lơ̆m jơ hnơr arih iung tơ blăh pơ jing teh đak păng vei teh đak đơ̆ng hơ drĕch hơ drŭng bơ̆n, tơ drong ‘năr 30-4-1975 jĭ 1 lơ̆m dôm tơ drong gĭt kăl hloh, tơ găl hăm teh đak păng apŭng plĕnh teh.

Pơ lei tơm Hồ Chí Minh tơ ƀơ̆p muh măt tơ băt 46 sơ năm năr Rơ ngei tơ ring pơ băh, rơ ngei teh đak

Bí thư Anih jang Đảng pơ lei tơm Hồ Chí Minh tơ ƀôh jơ hngơ̆m ƀlŏk hơ dơ̆r, băt ‘mêm kơ dôm bơ ngai hlôi plang jơ hngơ̆m, pham lĕch sĕch huŏng đơ̆ng kơ dih ăn tơ drong jang tơ blăh iŏk rơ ngei hơ drĕch hơ drŭng păng rơ ngei teh đak, yua kơ tơ drong hiôk hian kơ kon pơ lei. Tơ drong ‘nâu ư̆h khan lăp đei tơ drong ‘lơ̆ng hơ tŏk joăt joe, pôk pơ ư dôm tơ drong kăp gĭt kơ jơ hnơr arih mă oei jing ‘măng vă pơ jao jơ hngơ̆m đon ‘mêm kơ teh đak, tơ drong arih, hơ pơi ‘meh, đon hơ drin, chu plang hơ kâu lôch yua kơ teh đak, yua kơ kon pơ lei.

Thuem: Tơ blơ̆