VOV4.Bahnar - Pơ gê ‘năr 22-4, Anih vei lăng kon pơ lei dêh char Thái Nguyên pơ gơ̆r pơ ma đam Jang hơ dai hơ tŏk tơ iung tơ mang lăng 6 dêh char Việt Bắc: Hà Giang, Tuyên Quang, Bắc Kạn, Cao Bằng, Thái Nguyên, Lạng Sơn. Hloh 10 sơ năm jang hơ dai tơ mang lăng đơ̆ng 6 dêh char Việt Bắc kiơ̆ lơ̆m jơ hngơ̆m đon “ jang kơ dih – hơ tŏ hơ nơ̆ng – jơ nei – vang đei iŏk yua” hlôi iŏk đei dôm jơ nei hơ dăh ‘lơ̆ng, tour tơ mang lăng đei jang hơ dai, kơ sô̆ tơ moi tơ mang lăng tŏk ư̆h kơ đei pơ dơh kiơ̆ rim sơ năm hăm kơ sô̆ tŏk jô̆ păh lăp hloh 16%. 

Roi tơ bôh tơ mam păng tơ drong ‘lơ̆ng tơ mang lăng rim tơ ring

Jơ pơ ma đam iŏk đei lơ nơ̆r tơ gop đơ̆ng kơ dră chĕp kơ̆l, bơ ngai vei lăng, anih jang mơ dro sa tơ mang lăng vă pơ trŭt hơ tŏk tơ iung jang hơ dai tơ mang lăng tơ ring, pơm đei tơ mam tơ mang lăng roi ‘năr roi ‘lơ̆ng, pơm lăp hăm ‘meh vă đơ̆ng tơ moi tơ mang lăng. Khŭl jang tơ mang lăng rim dêh char Việt Bắc hlôi kĭ pơ kăp drơ̆ng nơ̆r jang hơ dai hơ tŏk tơ iung tơ mang lăng hăm Khŭl jang tơ mang lăng tơ pôl. Rim anih jang mơ dro sa 6 dêh char Việt Bắc kĭ pơ jăp jang hơ dai hăm rim anih jang mơ dro sa tơ mang lăng Hà Nội, pơ lei tơm Hồ Chí Minh.

Thuem: Tơ blơ̆