VOV4.Bahnar - Tơ băt 110 sơ năm năr rơ neh kơ nhap ƀok Đại tướng Võ Nguyên Giáp, tơ̆ dêh char Cao Bằng hlôi pơ gơ̆r lơ tơ drong jang hơ dăh ‘lơ̆ng. Pơ gê ‘năr 24/8, tơ̆ Anih gru groa teh đak gĭt kăl Bri Trần Hưng Đạo (xăh Tam Kim, apŭng Nguyên Bình), dêh char Cao Bằng hlôi pơ gơ̆r soh nhang, dan pơ kao tơ̆ Hnam soi kơ nhap ƀok Đại tướng Võ Nguyên Giáp. Đơ̆ng rŏng kơ pơm lêh soh nhang, dan kơ kao, kơ tă tơ̆ Anih gru groa teh đak gĭt kăl bri Trần Hưng Đạo, dêh char Cao Bằng hlôi pơ gơ̆r pơ ma đam hăm hơ năn “Đại tướng Võ Nguyên Giáp hăm pơ lei pơ la tơm a Cách mạng Cao Bằng”. 

Pơ ma đam hơ năn “Đại tướng Võ Nguyên Giáp hăm pơ lei pơ la tơm a Cách mạng Cao Bằng”

25 nơ̆r pơ ma dơ nuh đơ̆ng rim bơ ngai tang măt hlôi tơ gop pơm hơ dăh hơ năp jang tih tên đơ̆ng nhap ƀok Đại tướng hăm tơ drong jang kach mang Việt Nam, mă loi ‘noh jĭ jăl jang đơ̆ng 1941-1945, khei ‘năr nhap ƀok Đại tướng kơ tă bơ̆ jang tơ̆ dêh char Cao Bằng. Lơ nơ̆r pơ ma dơ nuh kŭm sơ kơ̆t hơ dăh dôm tơ drong vang tơ gop tih tên đơ̆ng kon pơ lei rim hơ drĕch hơ drŭng dêh char Cao Bằng lơ̆m tơ drong vei lăng Kach mang kŭm nhen hăm nhap ƀok Đại tướng Võ Nguyên Giáp, hơ nih nhap ƀok Đại tướng ling lang lăng ‘noh jĭ pơ lei pơ la mă 2 kơ sư.

Thuem: Tơ blơ̆