VOV4.Bahnar - Pơ gê  ‘năr 15/6, tơ̆ Hà Nội, Anih tơm vei lăng găh choh jang sa păng hơ tŏk tơ iung tơ ring tơ rang jang hơ dai hăm bơ ngai tang măt rim Anih tơm: Jang tơ bôl, jang pơ gang, Tơ mam drăm păng cham char, Kơ măy kơ mŏk mơ dro sa, Tơ lĕch nơ̆r sơ kơ̆t păng tơ mơ̆t jên jang, Liên hợp quốc tơ̆ Việt Nam păng rim anih jang hơ dai apŭng plĕnh teh, rim anih jang tơ chĕng hơ len, hnam trưng đăi hŏk, khŭl jang păng rim pang đei ƀơm truh, pơ gơ̆r pơ ma dơ nuh teh đak ‘măng mă mônh tơ̆ Hà Nội. ‘Nâu jĭ tơ drong jang gĭt kăl vă hơ met ăn Việt Nam vang hop akŏm kơ dră kơ pal găh tơ drong jang phe ƀa tơ mam sa kơ Liên hợp quốc pơ gơ̆r lơ̆m khei 9 sơ năm ‘nâu. Hop akŏm kơ dră kơ pal sơ năm 2021 kơ Liên hợp quốc vă chă trong ăn tơ drong jang phe ƀa tơ mam sa đei hơ tŏk tơ iung kơ jăp hloh, tôm hloh păng kĕ tơ jră ‘lơ̆ng hloh, pơm ăn đei ƀơm truh lơ trong vă iŏk đei rim tơ drong hơ găt hơ tŏk tơ iung kơ jăp lơ̆m sơ năm 2030. Hop akŏm âu akŏm tơ gop nơ̆r lơ̆m tơ drong hơ găt bơ̆ jang ‘noh đei: vei sơ đơ̆ng tơ drong gơ̆h yua phe ƀa tơ mam sa sơ đơ̆ng păng pơm hơ tŏ kơ chơ̆t bek ‘lơ̆ng ăn rim bơ ngai; tơ plih trong răt yua kiơ̆ trong ‘lơ̆ng păng kơ jăp; pơ trŭt jang sa rơ goh hăm cham char; hơ tŏk loi dơ̆ng hơ tŏ hơ nơ̆ng lơ̆m vang tơ gŭm kơ jă păng oei sa, pơ jing kĕ tơ jră tơ̆ hơ năp dôm tơ drong ư̆h kơ ‘lơ̆ng.

Thuem: Tơ blơ̆