VOV4.Bahnar - ‘Năr 21/10, Phŏ Kơ dră tơm jang tơ bôl Nguyễn Quốc Dũng păng Kơ dră tang măt ăn Anih tơm jang tơ bôl păng jang hơ doi hăm apŭng plenh tĕh kơ Campuchia vang pơ gơ̆r pơ ma nuh chinh trĭ Việt Nam – Campuchia ‘măng mă 7 kiơ̆ trong trư̆k tuyê̆n vă pơ ma găh tơ drong pơ vei 2 pang, jang hơ doi đơ̆ng 2 anih tơm jang tơ bôl păng dôm tơ drong lơ̆m apŭng plenh tĕh păng tơ̆ tơ ring đei tơ rĕk truh.

Tơ̆ jơ pơ ma nuh chinh trĭ, 2 păh drơ̆ng nơ̆r hơ tŏk tơ drong tĕch mơ dro, tưk tơ iung mŭk drăm đơ̆ng rŏng kơ jĭ hơ buh; hơ tŏk tơ drong jang hơ doi găh khul linh, vei lăng sơ đơ̆ng, hơ tŏk tơ drong đei yoa găh vei lăng trong sơ lam, atŭm hăm ‘nŏh jang hơ doi kơ jăp vă pơm hla ar ăn bơ ngai hơ drĕch Việt; hơ nơ̆ng hơ tŏk tơ drong đei yoa đơ̆ng jang hơ doi găh dôm tơ drong gĭt kăl nai nhen pơ tho pơ hrăm, roi tơ băt, jŏh ayŏ kơ dŏ xoang, tơ plŏng kơ dâu păng pơ gơ̆r tơ ƀâp ăn kon pơ lei…

Dơ̆ng: Tơ blơ̆