VOV4.Bahnar - Kiơ̆ kơ sô̆ chih jô̆ đơ̆ng Anih choh jang xa, dêh char Dak Lak dang ei đei 62 dơ nâu đak hư kăl đei hơ met ming. Tơ̆ hơ năp tơ drong ‘nâu, lơ̆m pơ yan ‘mi, dôm anih jang, tơ ring tơ rang tơ̆ Dak Lak oei jang kiơ̆ trong 4 kơ tă vă vei sơ đơ̆ng ăn dơ nâu đak păng tơ ring găh Pơ băh.

Hơ bong đak ro roi yôp, dơ nâu Ea Drăng athei hơ nơ̆ng pơ choh đak vă sơng đak tih truh

Đơ̆ng blŭng khei 9 truh dang ei, dơ nâu đak Ea Drăng, tơ̆ thĭ trơ̆n Ea Drăng, apŭng Ea H’Leo, dêh char Dak Lak, athei hơ nơ̆ng pơ choh đak vă sơng iŏk đak tih truh. Ƀok Nguyễn Văn Hiếu, Kơ dră chĕp kơ̆l Công ty TNHH 1TV vei lăng dơ nâu đak Dak Lak anih jang tơ̆ apŭng Ea H’leo, ăn tơ băt, chih iŏk tơ drong kăl đơ̆ng đak blai, lơ̆p tơ̆ tơ ring găh pơ băh sơ năm 2013 yoa đak krong roi yôp, kơ na lơ̆m pơ yan ‘mi, anih jang ăn bơ ngai trư̆k prăt măng, prăt năr tơ̆ dơ nâu vă pơ choh đak, vei sơ đơ̆ng ăn kon pơ lei thĭ trơ̆n Ea Drăng:

“Dơ nâu đak âu xă 58,6km2 mă lei lăp gơ̆h mong 1,217 triu khô̆i đĕch, kơ na kiơ̆ đơ̆ng tơ drong tơ dra tŏ ‘mi kial anih jang pơ choh đak mă lăp. Dang ei tơ dăh pơ choh dang 30 – 40m3 1 giây ‘nŏh đak lơ̆p đĭ chŭn ‘nhot kon pơ lei, kơ na athei lăng kiơ̆ yăn âu thoi âu athei pơ choh đak dang noh, vă sơng tơ mât đak đơ̆ng găh tu păng hue pơm kơ nê̆ truh tơ̆ kon pơ lei găh pơ băh hai.”

Dơ nâu buôn Pu Huê ưh đei anih pơ choh đak blai, đak gô blai tơ̆ trong năm tơ̆ xăh Ea Ktur - Cư Wi mưh đak tih truh

Kiơ̆ tơ drong dăr lăng tŏ ‘mi kial, ăn bơ ngai gak tơ̆ dôm anih kăl, hăm trong jang 4 kơ tă, dôm tơ ring, anih vei lăng dơ nâu đak tơ̆ Dak Lak kơ chăng bơ̆ jang kiơ̆ dôm trong vei sơ đơ̆ng dơ nâu đak lơ̆m pơ yan ‘mi. Ƀok Trịnh Văn Quang, vei lăng dơ nâu đak buôn Pu Huê, ăn tơ băt, bơ̆ găn đak lơ̆m dơ nâu hơ dai hăm pơm trong, găh trong năm tơ̆ dôm xăh Ea Ktur, Cư Wi, Ea Hu kơ apŭng Cư Kuin, mă lei ưh đei pơm anih pơ choh đak blai. Tơ drong ‘nâu pơm ăn dơ nâu buôn Pu Huê hơ nơ̆ng đei tơ drong krê hơ lih mưh pơ yan ‘mi đak tih truh:

“ ‘Măng hăm đing pơ choh đak âu ưh đei pơm lăp hăm tơ drong ‘mĕh vă pơ choh hŭt đak tih, kơ na pơ choh đak ưh kơ đĭ, pơm ăn đak tŏk blai trong, jing hơ mơt hăm dơ nâu, mă loi ‘nŏh hăm tơ drong sơ đơ̆ng kơ kon pơ lei tơ̆ tơ ter trong ‘nâu. Lơ̆m pơ yan ‘mi kial nhôn bơ̆ jang kơ jăp ‘lơ̆ng dôm trong hlôi đei tơ lĕch, mưh đei nơ̆r tơ roi găh đak tih ‘nŏh ăn bơ ngai gak 2 păh trong păng trư̆k pơ chŏh đak lơ̆m dơ nâu, tơ dăh đei tơ drong ‘nŏh athei vei lăng mă sơ đơ̆ng ‘lơ̆ng. Hơ pơi ‘mĕh tơ̆ hơ năp kơnh, rim anih jang kơ pal tơ chĕng hơ len đei trong tơ lĕch dơ̆ng jên jang hơ met pơ ‘lơ̆ng vă vei sơ đơ̆ng ăn dơ nâu đak, ăn trong yak năm tơ̆ dôm xăh âu.”

Bơ nơ̆ đak blai hư, dơ nâu Phù Mỹ (apŭng Ea H’leo) ưh gơ̆h mong đak

Kiơ̆ nơ̆r tơ roi đơ̆ng Anih vei lăng choh jang xa păng atŏk tơ iung tơ ring tơ rang dêh char Dak Lak, lơ̆m dêh char dang ei đei 785 dơ nâu đak, tơ ruih ăn hlŏh 262.000 ha ‘long pơ tăm lơ kơ loăi (hơ tŏ hăm dang 82% tĕh rei pơ tăm ‘long kăl đei tơ ruih đak). Vă vei sơ đơ̆ng dơ nâu đak lơ̆m pơ yan ‘mi, dêh char dăr hơ len, tơ tom hơ met ming 18 dơ nâu đak gĭt kăl, krê kơ bơ nơ̆r hơ lih. Mă lei, dang ei dêh char oei đei truh 62 tŏ dơ nâu đak hư kăl tơ lĕch jên hơ met ming, hăm kơ sô̆ jên hlŏh 360 ti.

‘Ngiĕt chă vă ƀĕnh dơ nâu Ea Msen (apŭng Cư Kuin), tôch krê hơ mơt mưh pơ yan đak tih truh

Kiơ̆ ƀok Nguyễn Thành Long, Kơ dră Anih vei lăng rim dơ nâu đak kơ dêh char Dak Lak, yoa jên tơ ring ưh kơ măh, tơ drong hơ met ming dơ nâu tơ tă apinh jên đơ̆ng trung ương ngăl, kơ na trong jang tơm a vă vei sơ đơ̆ng ăn dôm dơ nâu đak lơ̆m pơ yan ‘mi ‘nŏh athei jang kiơ̆ trong 4 kơ tă, kơ chăng hơ met tôm tơ mam kơ tă tơ̆ tơ ring:

“Hăm dôm anih anih vei lăng, iŏk yoa đak ‘nŏh athei kơ chăng ‘măn răk jên hơ met pơ gia, mă loi jĭ dôm anih hư, krê hơ lih pơ chăh athei jăh hơ met hloi. Mă 2 lơ̆m pơ yan ‘mi athei ăn bơ ngai gak prăt măng, prăt năr, tơ dăh athei pơ chŏh đak ‘nŏh athei tơ roi hơ drol ăn kon pơ lei băt. ‘Ngoăih kơ ‘nŏh hơ nơ̆ng dăr lăng tơ drong sơ đơ̆ng tơ̆ rim dơ nâu, tơ roi tơ tom ăn khul kơ dră tơ ring kŭm nhen anih vei lăng choh jang xa păng atŏk tơ iung tơ ring tơ rang dêh char vă đei trong hơ met pơ ‘lơ̆ng ming.”

Minh Huệ: Chih

Dơ̆ng: Tơ blơ̆